सबैले सेयर किनी नेपाली भिलेज यूके ऐतिहासिक परियोजना सफल पार्न आह्वान

नेपाली भिलेज यूके परियोजना कुनै व्यक्ति, संघ, कुनै धर्म र कुनै भेगको मात्रै नभएर समस्त नेपालीहरुको परियोजना हो । यसको मूल लक्ष्य भनेको बेलायतमा नेपाली कला, संस्कार, संस्कृतिलाई संरक्षण, संवर्द्धन र प्रवर्द्धन तथा विकास गर्ने एउटा थलो निर्माण गर्नु हो, यसको काम अगाडि बढिरहेको छ ।

यो परियोजना ४ वर्षअघि हामीले औपचारिक रुपमा अगाडि बढायौं । जसमा बेलायतका लागि नेपाली राजदूत पनि उपस्थित हुनुहुन्थ्यो । सँगै यहाँका स्थानीय व्यक्तिहरुको पनि बाक्लो उपस्थिति थियो । नेपाल र नेपाली डायस्पोरा यूकेका विभिन्न स्थानबाट धेरै गन्यमान्यहरु पनि उपस्थित हुनुभएको थियो । त्यसपछि यो परियोजना अगाडि बढिरहेको छ ।

यो परियोजना विशेषगरी हाम्रो भावी पिढीलाई नेपाली कला, संस्कार, संस्कृतिको बारेमा आएर सिक्ने ठाउँ दिने साथै पर्यटन प्रवर्द्धनमा पनि टेवा पुर्‍याउने । हुनसक्छ भने, अलकति अहिलेको परिस्थितिमा सबैलाई चाहिने वेलबिङ सेन्टरको रुपमा पनि खडा गर्ने लक्ष्य छ ।

सुरुमा हामीले यो परियोजनालाई तीन चरणमा अगाडि बढाएका थियौं । पहिलो चरण हासिल भइसकेको छ र हालमा दोस्रो र तेस्रो चरणलाई एकपटक अगाडि बढाइरहेका छौं । पहिलो चरणमा हामीलाई जरुरी पर्ने पैसा जम्मा गर्नुथियो । सेयरबाट दुई वर्षमा पैसा कलेक्सन गर्ने लक्ष्य राखेका थियौं । तर, साढे ५ महिनामै चाहिएको भन्दा बढी लगानी आएपछि हामीले रोक्न बाध्य भयौं । जम्मा भएको रकमबाट हामीले तीन वर्षअघि जग्गा खरिद गर्‍यौं । अहिले केही संरचना पनि तयार भएका छन् । हामीसँग अहिले १ सय ३ रोपनी (२४ एकड) जग्गा छ । साथसाथै ४ बेडरुमको घर र ठूलठूला दुई वटा वान र सेफहरु छन् । यी घर र वानहरुलाई रिनोभेट गर्न बाँकी छ ।

सुरुमा मर्मत गरेर फोर बेडरुमको होलिडे होमलाई हामीले सञ्चालनमा ल्याएका छौं । पछि यो घरलाई नेपालको जस्तै पिँढी निकालेर जहाँ ढिकी र जाँतोहरु पनि राख्ने । जसले गर्दा नेपाली घर जस्तो देखियोस् भन्ने हाम्रो लक्ष्य छ । साथै भएका वानहरुलाई कम्प्लिट रेनोभेसन गरेर अफिस र स्टोर बनाउने । ठूलो वानलाई एक्जिबिसन हल बनाउने । जहाँ नेपाल र वेल्सको ऐतिहासिक सामानहरुको डिस्प्ले गर्ने हो । त्यसलाई रेस्टुरेन्ट अथवा क्याफेको रुपमा पनि प्रयोग गर्ने ।

हामीसँग अहिले सानो कारपार्क छ । आउनका लागि साँघुरो बाटो छ । पछि प्लानिङ कमिसन प्राप्त भइसकेपछि मूल प्रवेशद्वार तलको जमिनबाट हुनेछ । जुन मूल बाटोबाटै कनेक्सन हुन्छ । पस्ने बित्तिकै ठूलो कारपार्क बायाँपट्टी । दायाँपट्टी ओचआर फलफूलहरुको बगैंचा हुन्छ ।

हामीसँग पछाडि ठूलो प्लट छ । बाँकी प्लटहरु अलि माथि छ । पछाडिको ठूलो प्लटमा ठूलो चौतारी, ढुंगेधाराहरु र विभिन्न नेपाली प्रख्यात सम्पदाहरुको रिप्लीक निर्माण गर्ने छौं | यो जमिनमा एक फन्को घुम्न करिब २ घण्टा लाग्छ । सानो प्लटको उतापट्टी खोला छ । उक्त खोला हाम्रो जमिनसँग जोडिएकोले सदुपयोग गर्न सक्छौं । जहाँ पानीघट्ट निर्माण गर्ने योजना छ । तर अहिले प्लानिङ पर्मिसन प्राप्त नभइसकेकोले हामीले कम्तीमात्रै रेनोभेसन गरेका छौं । बाँकी गर्नुपर्ने धेरै छ ।

यो कम्युनिटी बेस, कमर्सियल प्रोजेक्ट हो । सेयरको माध्यमबाट सञ्चालनमा ल्याएका छौं । ९ जना बोर्ड अफ डाइरेक्टर मेम्बरहरु हुनुहुन्छ । प्राय: सुरुमै मसँग जोडिनु भएको हो । हालसम्म ४ सय ६१ सेयर हामीले बेचिसक्यौं । यसमा सेयरधनीहरु नेपाली मात्रै नभएर यहाँका स्थानीय मेयर, काउन्सिलहरु व्यवसायीहरुदेखि लिएर अमेरिका, माल्टा, मध्यपूर्वबाट पनि हामीसँग जोडिनुभएको छ । साथै कतिपय साथीहरु नेपालबाट पनि हाम्रो उद्देश्यलाई मन पराएर जोडिनुभएको छ । यहाँहरुले पनि सेयर किन्नु भई अपनत्व लिन सक्नु हुने छ |

अहिले दोस्रो चरणमा हामीले प्लानिङ कमिसनमा सबै कागजात पेस गरिसकेका छौं । यो परियोजना राष्ट्रिय निकुञ्जभित्र पर्ने भएकोले प्लानिङ पर्मिसन पाउन समय लागेको छ । चुनौतीहरु आएको छ, त्यसलाई विस्तारै हल गर्दैछौं । तेस्रो चरणमा हामी आफ्नै होटल सानो प्लटमा बनाउनेवाला थियो । तर प्लानिङमा कठिनाइ आएकोले के गर्ने भन्ने सोचिरहेका थियौं । भाग्यवश हामीलाई नजिकै २२ कोठे भवन प्राप्त भयो । जुन हामीले खरिद गर्ने सम्झौता गरी बाँकी प्रक्रिया अघि बढाइसकेका छौं ।

(प्रबन्ध निर्देशक मेजर खुशीमान गुरुङ एमभीओले ६ जुन २०२६ मा नेपाली भिलेज यूके परियोजनाको स्थलगत भ्रमणमा पुगेका नेपाल पत्रकार महासंघ यूकेको टोलीलाई दिएको जानकारी भिडियोबाट साभार)