भूपू गोर्खाहरूलाई नागरिकको दर्जामा राख्न नेपाल सरकारसँग सांसद हर्कराज राईको माग

काठमाडौँ । श्रम संस्कृति पार्टीका अध्यक्ष एवं प्रतिनिधिसभा सदस्य हर्कराज राईले भूपू गोर्खाहरूलाई नागरिकको दर्जा दिन नेपाल सरकारसँग माग गर्नुभएको छ ।

प्रतिनिधिसभाको बिहीबार बसेको पहिलो बैठकमा सम्बोधन गर्दै सांसद राईले भूपू गोर्खाहरुको नेपाली नागरिकता कायम राखेर नागरिकको दर्जामा राख्नका लागि सरकारले कानुन बनाउनुपर्ने माग गर्नुभएको हो । ‘नेपाल सरकारले गरेको सन्धिमार्फत गएका भूपू गोर्खाहरूलाई नागरिकता कायम राखेर नागरिकको दर्जामा राख्न सरकारले कानुन बनाओस्,’ उहाँले भन्नुभयो ।

सांसद राईले भूपू गोर्खाको समान पेन्सनलगायतका मुद्दा सम्बोधनका लागि पनि नेपाल सरकारले तत्काल बेलायतसँग आवश्यक पहल गर्नुपर्ने बताउनुभयो ।

अमेरिकी सहयोग परियोजना एमसीसी खारेजको मुद्दा पनि उहाँले उठाउनुभयो । सुनसरी क्षेत्र नम्बर १ बाट निर्वाचित साम्पाङले पहिलो पटक संसद्‌मा सम्बोधन गर्नुभएको हो । उहाँ यसअघि धरान उपमहानगरपालिकाको मेयर हुनुहुन्थ्यो ।