लन्डनमा ए स्टार नेपाल बास्केटबल लिगको पाँचौँ संस्करण सुरु

लन्डन । ए स्टार नेपाल बास्केटबल लिगको पाँचौँ संस्करण सुरु भएको छ। अल्डरशटस्थित ग्यारिसन स्पोर्ट्स सेन्टर, रावलिन्सन रोडमा आइतबार आयोजित खेलमा पाँच टोलीले सहभागिता जनाएका थिए ।

लिगअन्तर्गत पहिलो खेल ह्याम्पशायर हूपर्स र ग्रीनफोर्ड नाइट्सबीच भएको थियो भने दोस्रो खेल कोलचेस्टर एलिट्स र स्यान्डहर्स्ट निक्सबीच भएको थियो । यसैगरी तेस्रो खेल डीबीएस र ग्रीनफोर्ड रोभर्सबीच सम्पन्न भयो भने चौथो खेल बेजीङस्टोक माम्बास र साउथ आशफोर्ड वुल्भ्सबीच खेलिएको थियो । पाँचौँ खेल हिमालयन हीट र बलर स्ल्यामर्सबीच भएको थियो।

यसपटक पुरुषतर्फ ११ टिम र महिलातर्फ ३ टिमले प्रतिस्पर्धा गर्नेछन्। पुरुषतर्फ प्रत्येक टिमले १० वटा लिग खेल खेल्नेछन्। लिग चरणपछि क्वार्टर–फाइनल, सेमिफाइनल र फाइनल खेलहरू आयोजना गरिनेछ। महिलातर्फ भने ‘होम एण्ड अवे’ प्रणालीअनुसार प्रत्येक टिमले २–२ खेल खेल्नेछन् र त्यसपछि फाइनल खेल हुने नेपाल बास्केटबल लिग २०२६ का कोअर्डिनेटर तथा कोच सार्थक गुरुङले बताए।

उक्त लिग आयोजना गर्न विमेन्स बलर्स क्लब (डब्लुबीसी) सँग पनि सहकार्य भै रहेको गुरुङले जनाए । उनले प्रमुख प्रायोजक ए स्टार लगायत सबै प्रायोजकहरुलाई धन्यवाद पनि दिए । लिगदेखि सेमिफाइनलसम्मका खेलहरू फेल्थाम स्प्रिङवेस्ट एकेडेमी र एल्डरशट ग्यारिसनमा सञ्चालन गरिनेछन् भने ४ जुलाई २०२६ मा सम्पन्न हुने फाइनल खेल ब्रुनेल विश्वविद्यालयमा आयोजना गरिने आयोजकले जनाएका छन् ।

नेपाल बास्केटबल लिग २०२६ का कोअर्डिनेटर तथा कोच सार्थक गुरुङले हरेक आइतबार पांच ओटा गेम संचालन हुने, टप आठ ओटा टोली नक आउटमा पुग्ने र त्यस पछि क्वार्टर फाइनल, सेमी फ़ाइनल्स र फाइनल प्रतियोगिता हुने जनाए । उनले गत जनवरी महिनामा नेपाल बास्केटबल यूकेले अन्डर २३ टुर्नामेन्ट आयोजना गरेको र उक्त प्रतियोगितामा १८ वर्ष भन्दा मुनिका युवाहरुको सहभागिताबाट आफुहरु निकै उत्साहित भएको बताए।

सुरुदेखि नै लिगको प्रमुख प्रायोजक रहँदै आएको ए स्टार फाइनान्सियल सलुशन्स यूकेका प्रवन्ध निर्देशक मीन दर्लामीले बेलायतमा रहेका नेपाली युवायुवतीका लागि एक प्लेटफर्म सृजना गरी बास्केटबलमार्फत उनीहरुको व्यक्तित्व विकासमा सघाउने उद्देश्यबाट प्रभावित भएर मुख्य प्रायोजन गरिएको बताए । युवाहरुलाई प्रोत्साहन गर्ने कार्यमा ए स्टारले निरन्तर सहयोग पुर्याउदै आएको पनि दर्लामीले जनाए ।