एनआरएनए हङकङद्वारा ईको कविता प्रतियोगिता आयोजना, विश्वभरका नेपाली साहित्यकारले भाग लिन पाउने

आगामी ३१ जनवरी २०२६ भित्र सिर्जना पढाउन आग्रह

लन्डन । गैरआवासीय नेपाली संघ (एनआरएनए) हङकङ राष्ट्रिय समन्वय परिषद्ले आगामी वर्ष ईको कविता प्रतियोगिता आयोजना गर्ने भएको छ ।

वातावरणीय चेतना फैलाउन, नेपाली साहित्यमा ईको कविता प्रवर्द्धन र विश्वभरका नेपाली साहित्यकारहरुलाई एकजुट गर्ने उद्देश्यसहित कविता प्रतियोगिता आयोजना गरिन लागेको हो । प्रतियोगितामा सहभागी हुने स्रष्टाहरुले ईको कविता (प्रकृति, वातावरण, जलवायु परिवर्तन आदि) विषयमा नेपाली भाषामा लेख्नु पर्नेछ ।

३ सय शब्दभित्रको मौलिक रचना हुनुपर्ने र एआईबाट सारांश वा लेखिएका कवितालाई प्रतियोगितामा समावेश नगर्ने समेत आयोजकले प्रस्ट पारेको छ । प्रतियोगितामा विश्वभरका नेपाली साहित्यकारहरुले डिजिटल माध्यमबाट भाग लिन सकिनेछन् । आगामी वर्षको ३१ जनवरी २०२६ भित्र सिर्जना पठाइसक्नुपर्ने छ । तर, अन्तिम नतिजा घोषणा मिति भने खुलाइएको छैन । प्रवेश नि:शुल्क गराइएको छ ।

प्रतियोगितामा सहभागीहरुका लागि कूल पुरस्कार राशि नेपाली रुपैयाँ १ लाख रहेको एनआरएनए हङकङले जनाएको छ । उकृष्ट ५० रचनाहरूको ई-पुस्तक प्रकाशन तथा सम्मानपत्र, उकृष्ट १० रचनालाई नेपाली ५ हजार तथा सम्मानपत्र,१० उकृष्टमध्ये सर्वोत्कृष्टलाई ३० हजार नेपाली रुपैयाँ तथा सम्मानपत्र प्रदान गरिने जनाइएको छ ।

प्रतियोगितामा प्राप्त सम्पूर्ण प्रकाशनयोग्य कवितालाई संस्थाको वेबसाईट तथा सामाजिक सञ्जालमा राखिने छ । रचना पठाउँदा रचनाकारले हालसालैको आफ्नो प्रस्ट फोटो, आफ्नो पूरा नाम, ठेगाना, सम्पर्क नम्बर र रचना मौलिक हो भनेर प्रतिबद्धता जनाएको हुनुपर्ने मापदण्ड तोकिएको छ ।