आदिवासी जनजाति समुदायलाई ‘पैसाले किन्न सकिन्छ’ भन्ने गौतमको अभिव्यक्तिप्रति आपत्ति

काठमाडौँ । नेपाल आदिवासी जनजाति महासङ्घ जिल्ला परिषद् सचिवालय चितवन जिल्लाले राष्ट्रिय स्वतन्त्र पार्टीकी नेतृ सोविता गौतमको अभिव्यक्तिप्रति गम्भीर ध्यानाकर्षण भएको जनाएको छ ।

सोमबार अध्यक्ष सागर कुमालद्वारा जारी प्रेस विज्ञप्तिमा चितवन क्षेत्र नम्बर ३ की प्रतिनिधि सभा उम्मेद्वार समेत रहेकी गौतमले चुनावी सभामा आदिवासी जनजाति समुदाय, विशेष गरी गुरुङ र थारु समुदायप्रति लक्षित गरी दिएको अभिव्यक्ति अपमानजनक, गैरजिम्मेवार र भ्रामक रहेको उल्लेख गरिएको छ । विज्ञप्तिअनुसार उम्मेद्वार गौतमले आदिवासी समुदायलाई ‘पैसाले किन्न सकिने’ र ‘बिक्न सक्ने’ वर्गका रूपमा टिप्पणी गर्नुले समुदायको स्वाभिमान, पहिचान र राजनीतिक चेतनामाथि गम्भीर प्रहार गरेको ठहर गरिएको छ । गुरुङ र थारु लगायतका समुदायलाई ‘सोझो’ र ‘पैसामा बिक्ने’ भनी वर्गीकृत गर्नु उम्मेद्वारको सङ्कीर्ण र नश्लवादी सोचको स्पष्ट संकेत भएको महासङ्घको भनाइ छ । आदिवासी जनजाति समुदाय आफ्नै इतिहास, योगदान र गौरव बोकेको सचेत नागरिक समाज भएको जनाउँदै मतदातालाई आर्थिक लेनदेनमा संलग्न हुन उक्साउनु निर्वाचन आचारसंहिताको उल्लङ्घन र लोकतान्त्रिक मूल्यको उपहास भएको आरोप लगाइएको छ ।

महासङ्घले उक्त अभिव्यक्तिप्रति २४ घण्टाभित्र सार्वजनिक माफी माग्दै लिखित स्पष्टीकरण दिन माग गरेको छ । अन्यथा चितवन क्षेत्र नम्बर ३ मा आफ्ना सम्पूर्ण संयन्त्र परिचालन गरी उम्मेद्वारविरुद्ध चुनावी बहिष्कार तथा सशक्त आन्दोलनका कार्यक्रम अघि बढाइने चेतावनी समेत दिइएको छ । उत्पन्न परिस्थितिको सम्पूर्ण जिम्मेवारी सम्बन्धित उम्मेद्वार र उनको दलले वहन गर्नुपर्ने महासङ्घको स्पष्ट धारणा छ । “हाम्रो स्वाभिमान हाम्रो पहिचान हो, यसमा खेलबाड गर्ने छुट कसैलाई छैन,” विज्ञप्तिमा उल्लेख गरिएको छ ।