‘द ब्लू लाइट’ केवल हेर्ने फिल्म मात्र होइन, यो अनुभूत गर्ने सिनेमा हो : निर्देशक बलिराम चौहान [अन्तर्वार्ता]

चलचित्र ‘द ब्लू लाइट’ यही माघ १६ गते रिलिज हुँदै छ । बलिराम चौहानले निर्देशन गरेको चलचित्रमा थुप्रै स्थापित कलाकार छन् । यो चलचित्र एकपटक हेरेर बिर्सिनेभन्दा पनि अनुभूत गर्ने सिनेमा भएको निर्देशक चौहानको भनाइ । उहाँले चलचित्रले मानव मन, एक्लोपन र वास्तविकता तथा भ्रमबीचको सूक्ष्म रेखालाई पहिल्याउने काम गरेको बताउनुभएको छ । आफू रातारात हिट हुन र त्यसैगरी हराउन नआएको बताउने निर्देशक चौहान आफू लामो रेसका लागि तयार भएर चलचित्र उद्योगमा प्रवेश गरेको बताउनुहुन्छ । निर्देशक चौहानसँग प्रदर्शनको तयारीमा रहेको चलचित्र ‘द ब्लू लाइट’का बारेका गरिएको छोटो कुराकानी :

ट्रेलर हेर्दा त ‘द ब्लू लाइट’ हरर फिल्म जस्तो देखियो, हो ?
होइन, हाम्रो चलचित्र हरर होइन । तर, केही दृश्य डरलाग्दा चाहिँ छन् ।

– ‘द ब्लू लाइट’ कस्तो चलचित्र हो, ताकि लगातार नेपाली सिनेमाले निराश बनाइरहेका बेला दर्शक यो चलचित्र हेर्न जाउन् ?
‘द ब्लू लाइट’ एक मनोवैज्ञानिक ड्रामा–थ्रिलर फिल्म हो । यो केवल हेर्ने फिल्म मात्र होइन, यो अनुभूत गर्ने सिनेमा हो । यसले मानव मन, एक्लोपन र वास्तविकता तथा भ्रमबीचको सूक्ष्म रेखालाई अन्वेषण गर्छ ।

– ‘द ब्लू लाइट’मा कलाकारहरूको ठूलो जमघट देखिएको छ, भूमिकालाई लिएर कलाकारलाई चित्त बुझाउन कठिन भएन ?
त्यस्तो केही कठिनाइ आएन । सबैले मन पर्ने पात्र नै पाउनुभएको छ । रेगुलर गर्दै आएका पात्रभन्दा फरक र प्रभावशाली पात्र रहेकाले यस फिल्मका हरेक कलाकार खुसी नै हुनुहुन्छ ।

– पछिल्ला केही वर्षलाई हेर्ने हो भने डेब्यु निर्देशकको बाढी छ, तर जसरी आइरहेका छन्, त्यसैगरी हराइरहेका पनि छन्, चलचित्र रिलिजपछि तपाईंको स्थान कहाँनेर होला ?
सबैको यात्रा र गन्तव्य फरक हुन्छ । मैले दिने योगदान पनि फरक हुन्छ । म आफूलाई एउटा लामो यात्राको लागि तयार गरेको छु । मलाई रातारात न चम्किनु छ, न त हराउनु छ ।

– प्रेम, धोका र बदलाको आइडिया आफैँमा नयाँ होइन, दशर्कलाई होल्ड गर्ने के छ खास ?
हामीले देखाउन खोजेको विष्यवस्तु नयाँ पक्कै पनि छैन । तर, हामीले त्यही कुरालाई नयाँ शैलीमा देखाएका छौँ । यसभित्र रहेका पात्रका संवेग र भावनाहरू उच्च संबेदनसशील छन्, जसले दर्शकलाई एक खालको अनुभव दिन्छ भने आशा गर्दछौँ ।

– ‘द ब्लू लाइट’ हिरो बेनिशा कि अर्पण अथवा अरु कोही हो ?
दुवै हुन् । उहाँहरुकै वरिपरि यो चलचित्रको कथा घुम्छ ।