दक्षिण अस्ट्रेलियाको संसदमा दशैं-तिहार विशेष समारोह

एडिलेड । नेपालीहरू जहाँ पुगे पनि आफ्ना चाडपर्व र सांस्कृतिक अभ्यासलाई निरन्तरता दिइरहेका छन् । अस्ट्रेलियाको एडिलेडमा रहेका विभिन्न नेपाली संस्थाहरूले नेपाली भाषा कक्षा संचालन र सांस्कृतिक चाडपर्व आयोजना गर्दै आएका छन् । नेपालीहरूको संख्या बढ्दै गएसँगै साउथ अस्ट्रेलियामा नेपाली संस्कृति, भाषा र परम्पराप्रतिको रुचि पनि बढ्दै गएको देखिन्छ ।

यही पृष्ठभूमिमा, साउथ अस्ट्रेलिया सरकारका बहुसांस्कृतिक मन्त्री जो बेट्टिसनले हालै संसद् भवनमा दशैं र तिहारको उपलक्ष्यमा विशेष समारोहको आयोजना गर्नुभयो । गत वर्ष साउथ अस्ट्रेलिया सरकारले नेपाली भाषी संघ–संस्थाको सहभागितामा दशैं विशेष कार्यक्रम आयोजना गरेको थियो भने यस वर्ष तिहारलाई पनि समेट्दै “दशैं–तिहार विशेष समारोह” आयोजना गरेको हो ।

मन्त्री बेट्टिसनले नेपाली समुदायको योगदान, एकता र सांस्कृतिक मूल्यप्रतिको सम्मानस्वरूप यो कार्यक्रम गरिएको बताउनुभयो । उहाँले नेपाली समुदायलाई “सांस्कृतिक सम्पदाका वाहक”को रूपमा सम्बोधन गर्दै आफ्ना परम्पराहरूमा गर्व गर्न प्रेरित गर्नुभयो । साथै, भविष्यमा पनि यस्ता अवसरहरूलाई निरन्तरता दिने प्रतिबद्धता व्यक्त गर्नुभयो ।

कार्यक्रममा सहभागीहरूले देउसी–भैलोको आकर्षक प्रस्तुति पनि दिएका थिए । पारम्परिक लयमा प्रस्तुत देउसी–भैलोले सभाकक्षमा उत्सवमय कार्यक्रमले प्रवासमा रहेका नेपालीहरू आफ्नो सांस्कृतिक पहिचान जोगाउन र नयाँ पुस्तामा भाषा तथा परम्पराको सम्मान जगाउन कति सक्रिय छन् भन्ने देखाएको छ । भुटानी–नेपाली संघ संस्थाका प्रतिनिधिहरूको सहभागिताले प्रवासी नेपालीहरूको साझा पहिचान र एकताको सन्देश झल्काएको थियो।

साउथ अस्ट्रेलिया सरकारले विगतमा विभिन्न देशका समुदायहरूको संयुक्त सहभागितामा दीपावली/दिवाली विशेष कार्यक्रम आयोजना गर्दै आएकोमा, यस वर्ष नेपाली भाषी समुदायको सम्मानमा मौलिक पर्व तिहारलाई पनि समेटी नेपाली समुदायसँगै दशैं–तिहार विशेष समारोह आयोजना गरेको हो । यो पहलले साउथ अस्ट्रेलियाको बहुसांस्कृतिक राज्य भावनालाई अझ सुदृढ बनाएको सहभागीहरूको भनाइ छ ।

समारोहमा पण्डित शास्त्री संभव सुवेदी स्वस्तिवाचन गरेर पुजा गर्नु भएको थियो भने अस्ट्रेलियामा हुर्कदै गरेको दोस्रो पुस्ताको प्रतिनिधित्व गर्दै रितिशा दहालले दशैं-तिहारमाथि प्रकाश पार्नु भएको थियो । कलाकार क्षितिज सापकोटाले देउसी-भैलौ भट्याउँदा सभाहल नेपालमय भएको थियो । कार्यक्रममा विशेष जलपानको व्यवस्थासमेत गरिएको थियो ।

कार्यक्रममा साउथ अस्ट्रेलिया सरकारको बहुसांस्कृतिक आयोगकी सदस्य मञ्जु खड्काले दशैं–तिहारको सांस्कृतिक महत्त्वबारे जानकारी दिनुभयो । उहाँले नेपाली समुदायका परम्परागत पर्वहरूले सामाजिक एकता, पारिवारिक सुदृढीकरण र सकारात्मक सांस्कृतिक आदान–प्रदानमा योगदान पुर्‍याउने बताउनुभयो । साथै, साउथ अस्ट्रेलिया सरकारले नेपाली समुदायका पर्वहरूलाई सम्मानका साथ मनाउने परम्परा सुरु गरेकोमा धन्यवाद ज्ञापन गर्दै यो पहलले प्रवासी नेपालीहरूको मनोबल र सांस्कृतिक पहिचान सुदृढ भएको टिप्पणी गर्नुभयो ।