चितवन । भरतपुर महानगरपालिकाका प्रमुख रेणु दाहालले संयुक्त अधिराज्य बेलायतको हाउस अफ कमन्सका उपसभामुख नाइजल इभान्ससँग भेटवार्ता गर्नुभएको छ ।
अन्तर्राष्ट्रिय मेयर अवार्ड थाप्ने सिलसिलामा हाल बेलायत रहनुभएका दाहाल र उपसभामुख इभान्सबीच लण्डनमा भेटवार्ता भएको हो ।
दाहालले दिनुभएको जानकारीअनुसार भेटका क्रममा वर्षौंदेखिको नेपाल–बेलायत सम्बन्ध तथा ब्रिटिस सेनामा सेवा गरिरहेका गोर्खा सैनिक लगायतका विषयमा कुराकानी भएको थियो । त्यसअवसरमा दुई देश र जनताजनताबीचको ऐतिहासिक सम्बन्धबारे छलफल भएको पनि उहाँले जानकारी दिनुभयो ।
सो अवसरमा ‘भरतपुर भ्रमण वर्ष २०२४’ मा सहभागी हुन नेपाल आउन प्रमुख दाहालले उपसभामुख नाइजललाई निमन्त्रणा गर्नुभएको थियो । भरतपुर महानगरपालिकाले सन् २०२४ लाई ‘घुमौँ भरतपुर’ नारासहित भरतपुर भ्रमण वर्षका रुपमा मनाइरहेको छ ।
सो भेटपश्चात् नाइजलले बेलायती संसद्को इतिहासको अध्ययन गर्नुका साथै संसदीय गतिविधि र संसद् भवनको अवलोकन गर्नुभएको दाहालले जानकारी दिनुभयो ।
