लण्डन । वयोवृद्ध पूर्व गोरखा भूतपूर्व सैनिकहरुलाई सहयोग गर्ने च्यारिटीका लागि कोष संकलन गर्ने कार्यक्रममा प्रसिद्ध नेपाली कलाकारहरु मदनकृष्ण श्रेष्ठ र हरिवंश आचार्य बेलायत आउनुहुने भएको छ ।
आइतबार यसबारेमा जानकारी दिन आयोजित पत्रकार सम्मेलनमा आयोजक द गोरखा सेन्टरले सो जानकारी दिएको हो ।
कलाकार श्रेष्ठ र आचार्य डिसेम्बर २० मा बेलायत आउने तय भएको छ भने डिसेम्बर २३ तारिखमा लण्डनमा र २४ तारिखमा अल्डरसटमा उहाँहरुको कार्यक्रम राखिएको छ । लण्डनस्थित ह्यारो लिजर सेन्टरमा राखिएको कार्यक्रममा कलाकार प्रकाश सपुत पनि सहभागी हुने बताइएको छ भने अल्डरसटको एम्पायर हलमा हुने कार्यक्रममा गत सिजनका भ्वाइस अफ नेपालका विजेता करण राई सहभागी हुनेछन् । उहाँहरुका साथै स्थानीय कलाकारहरुले पनि कार्यक्रममा प्रस्तुति दिने बताइएको छ ।
द गोरखा सेन्टरका संस्थापक भीम तामाङले कार्यक्रमबाट संकलित राशीले पूर्व गोरखाहरुलाई आर्थिक, सामाजिक, भाषिक रुपमा सहयोग गरिने जानकारी दिए । बेलायतको च्यारिटी कमिसनमा दर्ता भएको सेन्टरले केही वर्षदेखि पूर्व गोरखाहरुलाई स्वास्थ्य, भाषा, तन्दुरुस्ती, सेवा लगायतका क्षेत्रमा सहयोग गर्दै आएको छ ।
कार्यक्रमको टिकट शुल्क अग्रीम खरिदमा २५ रुपियाँ राखिएको छ ।
