कोशी सरकारलाई विश्वासको मत, संवैधानिक प्रश्न कायमै

विराटनगर । कोशी प्रदेश सरकारका मुख्यमन्त्री उद्धव थापाले विश्वासको मत पाउनुभएको छ ।
आज बसेको प्रदेशसभाको बैठकमा मुख्यमन्त्री थापाको पक्षमा ४७ मत र विपक्षमा ३० मत परेको छ । बैठकमा १६ प्रदेशसभा सदस्य अनुपस्थित रहनुभएको थियो ।
संविधानको धारा १६८ को उपधारा ४ बमोजिम आज मुख्यमन्त्री थापाले विश्वासको मत लिनुभएको हो । प्रदेशसभाको अर्को बैठक यही भदौ ६ गते दिनको ३ बजे बस्ने छ ।
दोस्रोपटक मुख्यमन्त्रीमा नियुक्त थापाले विश्वासको मत लिने बेलामा कोशी प्रदेशको संसदमा नाटक नै मन्चन भएको छ । सभामुख बाबुराम गौतमले पदबाट राजिनामा दिएर मन्त्री बनेपछि सभामुख पद रिक्त छ भने उपसभामुख सिर्जना दनुवार मुख्य मन्त्रीले विश्वासको मत लिने मिति तोकेर स्वास्थ्यमा समस्या आएको भन्दै काठमाडौँ हिँडेकी थिइन् । उनको अनुपस्थितिमा अध्यक्ष मण्डलका सदस्यहरुले बैठकको अध्यक्षता गर्नुपर्ने प्रावधानका कारण बैठकको अध्यक्षता गर्नुपर्नेभएकाले उनीहरूले बिदा लिएका थिए ।
आज बसेको बैठकमा पनि पालैपालो बैठकको अध्यक्षता गरी मत हालिएको छ । यसबारेमा सर्वोच्चमा जाने प्रतिपक्षको भनाइ छ । अघिल्लोपटक सभामुखले हालेको मत बदर गर्ने सर्वोच्चले यसपटक के गर्ने हो हेर्न बाँकी छ ।