किन भोट हार्यो ?

चुनाव आयो भने मात्र गाउ फर्की आउने
अरुबेला रातो-दिन शहर बजार धाउने
ठेक्का पट्टा कमिसनले परिवार पाल्ने
यिनले भोट नहारेर कसले हो त हार्ने ?

गाउघरमा आउँदा पनि टाइसुटमै आउने
ससुराली जादा पनि हेलिकप्टेर चाहिने
गरिखाने जनताको कुरै नसुन्ने
यिनले भोट नहारेर कसले हो त हार्ने ?

छोरी,चेली जस्तै सधैं क्रिम पाउडर घस्ने
नङ काट्न नसकेर ह्याण्डसम पार्लर पस्ने
माछा, मासु बिना त भान्सै नबस्ने
यिनले भोट नहारेर कसले हो त हार्ने ?

चुनाव जिति गएपछि फर्की नआउने
जनताको पक्षमा माखो नमार्ने
सुरापान, सुन्दरीमै मस्ती सधैं मार्ने
यिनले भोट नहारेर कसले हो त हार्ने ?

पार्टीभन्दा बाहिरकालाई वास्तै नगर्ने
सानो काम लगायो कि कमिसन माग्ने
आफ्नै कार्यकर्तालाई नि दास,दासी ठान्ने
यिनले भोट नहारेर कसले हो त हार्ने ?

देशभक्ती र राष्ट्रवादको कुरा पनि गर्ने
राष्ट्रघाती सन्धी गर्न अघि पनि सर्ने
एमसिसीको कमिसनले राजनीति गर्ने
यिनले भोट नहारेर कसले हो त हार्ने ?

मतदातालाई अपमानित गर्ने
भोट हुनुभन्दा पहिला भगवान भन्ने
भोट पाइसके पछि भेडाबाख्रा ठान्ने
यिनले भोट नहारेर कसले हो त हार्ने ?