काठमाडौँ । यसपटकको आमनिर्वाचनमा नेकपा एमाले र नेकपा माओवादी केन्द्र दुवै पार्टीका प्रभावशाली पद मानिने महासचिवहरु पराजित भएका छन् ।
लमजुङबाट प्रतिनिधिसभा सदस्यतर्फ उम्मेदवार रहेका नेकपा माओवादी केन्द्रका महासचिव देवप्रसाद गुरुङ नेकपा (एमाले) का उपमहासचिव पृथ्वीसुब्बा गुरुङसित पराजित भएका छन् ।
जिल्ला निर्वाचन कार्यालयका प्रमुख नारायणप्रसाद सापकोटाका अनुसार विजयी पृथ्वीसुब्बाले ३४ हजार नौ सय ६९ मत प्राप्त गर्नुभएको छ । पराजित गुरुङले ३१ हजार सात सय ८१ मत प्राप्त गर्नुभएको छ ।
कूल एक लाख ३३ हजार पाँच सय ५९ मतदाता रहेकामध्ये ८० हजार एक सय ९२ मत खसेको जिल्ला निर्वाचन कार्यालयले जनाएको छ । देव गुरुङ यसअघिको निर्वाचनमा सोही निर्वाचन क्षेत्रबाट जितेका थिए भने पृथ्वी सुब्बा प्रदेशतर्फ चुनाव जिती गण्डकी प्रदेशको मुख्य मन्त्री बनेका थिए ।
यसैगरी, दाङ क्षेत्र नं २ को प्रतिनिधिसभा सदस्यको उम्मेदवार रहेका नेकपा एमालेका महासचिव शंकर पोखरेल नेकपा (माओवादी केन्द्र)की रेखा शर्मासित पराजित भएका छन् । शर्माले २६ हजार आठ सय ७७ मत प्राप्त गरी विजयी हुँदा पोखरेलले २६ हजार छ सय ८१ मत प्राप्त गर्नुभएको मुख्य निर्वाचन अधिकृत कृपासुर कार्कीले जानकारी दिनुभयो । उहाँहरूबीचको मतान्तर एक सय ९६ रहेको छ ।
उक्त क्षेत्रमा एक लाख ३३ हजार सात सय ४८ मतदातामध्ये ७९ हजार चार सय ४६ मत खसेको थियो । निर्वाचित शर्मा माओवादी केन्द्रको केन्द्रीय सदस्य तथा पूर्वमन्त्री हुनुहुन्छ भने पोखरेल नेकपा (एमाले)का महासचिव तथा लुम्बिनी प्रदेशका पूर्वमुख्यमन्त्रीसमेत हुनुहुन्छ ।
