एमाले वरिष्ठ उपाध्यक्ष ईश्वर पोखरेल पराजित

काठमाडौँ । आमनिर्वाचनमा प्रभावशाली नेताहरुले पनि अनपेक्षित परिणाम भोग्नु शुरु गरेका छन् । यसक्रममा नेकपा (एमाले) का दोस्रो वरियताका नेता, वरिष्ठ उपाध्यक्ष ईश्वर पोखरेल काठमाडौँ-५ बाट पराजित भएका छन् ।

यसअघिको निर्वाचनमा सोही क्षेत्रबाट निर्वाचित पोखरेललाई नेपाली काँग्रेसका युवा नेता प्रदीप पौडेलले हराएका हुन् । मंगलबार सम्पन्न मतगणनाअनुसार पौडेलले १५ हजार २३७ मत पाए भने पोखरेलले १० हजार १७५ मत मात्र पाए ।

पौडेल तनहुँबाट टिकटको आकांक्षी थिए तर रामचन्द्र पौडेल तनहुँबाट उठ्ने भएपछि काठमाडौँमा उनलाई उठाइएको थियो । नेपाल विद्यार्थी संघका पूर्व अध्यक्षसमेत रहेका पौडेल गत निर्वाचनमा प्रदेश सभा सदस्यमा ५ मतले पराजित भएका थिए ।

उता पोखरेल भने २०४८ यता नै एमालेको प्रभावशाली नेता रहँदै आएका छन् । तथापि संसदमा उनको जित भने सधैँ एकनासको थिएन । उनी कहिले धनुषाबाट त कहिले काठमाडौँबाट पराजित भएका थिए ।