कसरी दिइँदै छ बेलायतमा कोरोना विरुद्धको खोप ?

लण्डन । कोरोना भाइरसविरुद्ध विकसित गरिएको खोप पहिलो पटक आममानिसमा आउँदो मंगलबार बेलायतमा दिइँदै छ ।

ओैषधि निर्माता फाइजर र बायोएनटेकले संयुक्त रुपमा विकास गरेको सो खोपको डोज बिहीबार साँझ बेल्जियमबाट स्थलमार्ग हुँदै बेलायत आइसकेको छ भने बेलायत सरकारले सो खोप दिनका लागि ५० वटा राष्ट्रिय स्वास्थ्य सेवा (एनएचएस) ट्रष्टलाई जिम्मेवारी दिएको छ ।

यतिबेला सर्वसाधारणको मनमा जिज्ञासा हुनसक्छ खोप लगाउने मानिसहरु कसरी छनौट गरिन्छ ?

एनएचएस प्रोभाइडर्सका प्रमुख कार्यकारी अधिकृत क्रिस होपसनका अनुसार ५० वटा एनएचएस ट्रष्टहरुले अहिले पहिलो चरणमा आफ्नो क्षेत्रका केयर होम र स्थानीय निकायसित केयर होमका बासिन्दा र उनीहरुका रेखदेखकर्ताहरुलाई खोप लगाउन आउन समन्वय गरिरहेका छन् । त्यसपछि अस्पतालहरुले ८० वर्षमाथिका मानिसहरुको पहिचान गर्नेछन् र उनीहरुलाई खोप लगाउनका लागि बोलाउने छन् । यसरी खोप लगाउनेहरुमा अधिकांश अस्पतालका बहिरंग र अन्तरंग सेवा लिइरहेका बिरामीहरु हुनेछन् ।

खोपलाई माइनस ७५ डिग्रीमा भण्डारण गर्न पर्ने भए पनि सो तापक्रमबाट निकालेको ६ घन्टासम्म पनि खोपमा कुनै असर नपर्ने भएकाले केयर होममै लगेर खोप लगाउन सकिने पनि मेडिसिन्स एण्ड हेल्थकेयर प्रोडक्टस रेगुलेटरी एजेन्सी (एमएचआरए)ले जनाएको छ ।

अस्पतालहरुले पहिलो डोज खोप लिएकाहरुलाई तीन सातापछि अर्को डोज लिन आउन भन्नेछन् ।

यसअघि संयुक्त खोप तथा प्रतिरक्षा समितिले कसले पहिले खोप पाउने भन्ने बारेमा प्राथमिकताको सूची बनाएको छ । जसअनुसार शुरुमा केयर होमका बसिरहेका वृद्धावस्थाका मानिस र उनीहरुका रेखदेखकर्ताले पाउने छन् । त्यसपछिको प्राथमिकता ८० वर्ष वा सो भन्दा माथिको उमेर माथिका सबै मानिसहरु तथा स्वास्थ्य र सामाजिक सेवाका क्षेत्रमा कार्यरत मानिसहरुलाई दिइएको छ ।

त्यसपछि ७५ वर्ष वा सो भन्दा माथिका उमेरका मानिसहरुलाई खोप दिइनेछ । उनीहरुपछि ७० वर्ष उमेर पुगेका वा सोभन्दा माथिका र अति गम्भीर स्वास्थ्य समस्या भएकाहरुलाई खोप दिइनेछ । त्यसपछिको पालो ६५ वर्ष वा सोभन्दा माथिकाहरुलाई दिइनेछ । उनीहरुपछि १६ देखि ६४ वर्ष उमेर समूहका तर स्वास्थ्य समस्या भएकाहरुलाई खोप दिइनेछ । त्यसपछि ६० वर्ष वा सोभन्दा माथिकालाई र त्यसपछि ५५ वर्ष वा सोभन्दा माथिकालाई खोप दिइने छ ।