बेलायतका लागि पूर्व राजदूत शर्माको ह्दयघातका कारण निधन

लन्डन । बेलायतका लागि नेपाली पूर्व राजदूत 
मुरारीराज शर्माको ह्दयघातका कारण मंगलबार लन्डनमा निधन भएको छ ।

लन्डन पट्नी निवासी ६८ वर्षीय शर्माको बिहान पौने ११ बजेतिर घरमै निधन भएको शर्माका आफन्त एवं दूतावासका पूर्व कर्मचारी अनिल अधिकारीले जानकारी दिए । उनी ‘मर्निङ वाक’ गरि घर फर्किएर ब्रेकफास्ट खाएपछि त्यस्तो दुःखद निधन भएको हो ।

शर्माको शव टुटिङस्थित सेन्ट जोर्ज हस्पिटलमा राखिएको छ । शर्मा श्रीमति निलाका साथ लन्डनमा थिए । उनका दुई छोरा अमेरिकामा चिकित्सक छन् । शर्माको अन्त्येष्टी छोराहरु अमेरिकाबाट आएपछि कहां गर्ने भन्नेबारे टुंगो लाग्ने अधिकारीले बताए ।

सन् २००७ नोभेम्बर देखि २००९, अप्रिलसम्म शर्मा लन्डनस्थित नेपाली दूतावासमा १८ औं राजदूतका रुपमा कार्यरत थिए । उनले संयुक्त राष्ट्रसंघको स्थायी प्रतिनिधि भएर पनि काम गरेका थिए । पूर्व परराष्ट्र सचिव शर्माले अर्थ, गृह र सामान्य प्रशासन मन्त्रालयमा पनि काम गरे ।

लन्डनमा राजदूतको कार्यकाल बांकी छंदै प्रचण्ड नेतृत्वको तत्कालिन माओवादी सरकारले उनलाई फिर्ता बोलाएपछि शर्मा सुरक्षाका कारण भन्दै नेपाल नगइ लन्डनमै बसेका थिए ।

राजदूतबाट हटेपछि शर्मा लन्डनमा पुस्तक, लेख, गीत, कविता लेखन आदिमा व्यस्त थिए । उनको स्थायी घर भोजपुर दिङ्ला हो ।