पुनम नेतृत्वको नव निर्वाचित कार्यसमितिलाई विवादमा पार्ने प्रयास

लन्डन- केही हप्ताको रस्साकस्सीपछि गैर आवासीय नेपाली संघ बेलायतको चुनावी माहोल साम्य भएको छ । संघको इतिहासमा बेलायतले एक सक्षम तथा जुझारु महिला नेतृत्व पाएको छ । विजेता एक पक्षले विजयी समारोह मनाइसकेको छ भने अर्को पक्षले अझै सपथ ग्रहण नगरेको अवस्था छ ।

खाटा बस्न लागेको घाउलाई फेरि चर्काउने खेलमा केही केन्द्रीय नेताहरू लागेको र विश्वको सबैभन्दा ठूलो एनसीसी बेलायतको ‘डेलिगेट’ लिस्टमा चलखेल वा षडयन्त्र गरेर नव निर्वाचित अध्यक्ष पुनम गुरुङ र उनको स्वच्छ छविमा दाग लगाउने काम हुन थालेको भनि गैर आवासीय नेपाली संघका अग्रजहरूले चिन्ता व्यक्त गरेका छन् ।

केन्द्रीय नेताहरूको इसारा र प्रलोभनमा परेर बेलायतबाटै केही व्यक्तिहरूले नव निर्वाचित महासचिव फडिन्द्र भट्टराईलाई पनि विवादमा पार्न चलखेल गरेका खबरहरु सामाजिक संजालमा आइरहेका छन् ।

नयां कार्यसमितिलाई मतदान गर्ने मतदाताले नयांपन र परिवर्तन आस गरेकोमा नितान्त व्यक्तिगत भ्रमणमा आएका भनिएका केन्द्रीय महासचिवलाई खादा लगाउन नवनिर्वाचित कमिटीका जिम्मेवार नेताहरू एयरपोर्ट पुग्नुलाई ‘चाकडी प्रवृत्तिको निरन्तरता’ को रुपमा हेरिएको छ ।

एकजना केन्द्रिय नेता बेलायत आउनासाथ कार्यसमितिको निर्णय बेगर गैर आवासीय नेपाली संघ बेलायतको वेबसाइटमा रहेका सदस्यहरूको लिस्ट अकस्मात हटाइनुले अनेक आशंका जन्माएको छ । जब कि इच्छुक डेलीगेटसहरूले आफ्नो सदस्यता नम्बर हेर्न लिस्टमा हेर्नुपर्ने हुन्छ । लिस्टको लिंक हटाईएसंगै त्यो नपाइने भएको छ भने लिस्टमा नभएका नयां नाम थपिने आशंका जन्माएको छ ।

बेलायतको निर्वाचनताका उत्पन्न असहमतिहरूलाई मिलाएर दुबै पक्षलाई एक स्थानमा ल्याउने र सहज वातावरण बनाउन केन्द्रीय उपाध्यक्ष कुल आचार्यले महत्वपूर्ण भूमिका निर्वाह गरेका थिए ।

अध्यक्षका उम्मेदवार कुमार पन्तले एक पक्षलाई साथ दिएजस्तो गरी विना समाधान जबरजस्ती पेलेर बिवाद मिलाउन उक्साएको तथा वर्तमान केन्द्रीय महासचिवले केन्द्रीय उपाध्यक्षको सकारात्मक, सहज र दीगो पहलको ख्याल नगरी पटक-पटक लेटरप्याडको दुरुपयोग गर्दै कार्यसमितिलाई पत्तो नदिई तोक आदेश गर्ने गरेको आरोप लागेको छ ।

केन्द्रीय अध्यक्ष भवन भट्ट लगायतका जिम्मेवार नेताहरूले एनसिसिको अधिकारमा चलखेल गरेर निष्पक्ष निर्वाचन र नेतृत्व हस्तानतरण प्रक्रियालाई व्यवधान नगर्न अनुरोध गरेका छन् ।

 नवनिर्वाचित अध्यक्ष पुनम गुरुङबाट अहिले विद्यमान चलखेल र विकृति रोकिने आस गरेका गैर आवासीय नेपाली तप्काबाट केही पत्रकार र फेसबुककारहरू सल्लाहकार बनी संस्थाको सूचनालाई जान्ने भएर आदेश जस्तो गरेर संप्रेषण गरिनु, केहीले कार्यसमितिलाई निर्देश नै गरे झैं गरी इसारामा नचाउन खोज्नु जस्ता गतिविधि हुन थालेपछि गम्भीर चासोका साथ हेरिएको छ ।