‘लोभलाग्दो’ प्रोफाइल भएकी सचिवकी उम्मेदवार

लन्डन । एनआरएनए भन्नासाथ बुद्धिजीवी, पेशाकर्मीहरुको सहभागिता कम व्यापारी तर पैसावालहरुको बढी स‌ंलग्नता भएको संस्था बुझिन्छ । तर आसन्न एनआरएनए युकेका केही शिक्षित र बौद्धिक उम्मेदवार पनि चुनावी मैदानमा छन् । यस्तैमा एक उम्मेदवार हुन् युके राष्ट्रिय समन्वय समितिमा महिला सचिवकी उम्मेदवार लीला हाङमा सेलिङ माबो ।

पाँचथरको साबिक ओयाम गाबिस (हाल याङवरक गाउँपालिका ३) मा बुबा भीमकुमार सेलिङ र आमा राममाया सेलिङकी पहिलो सन्तानका रुपमा लीलाको जन्म भएको हो । उनका बाबा पूर्व प्रधानाध्यापक र विद्यालय ब्यवस्थापन समितिका अध्यक्ष हुन् भने आमा महिला सङ्गठन ओयामकी पूर्व सभापति हुन् । बाबाकै पाइला पछ्याउँदै उनले गुप्तेस्वर उच्च मावि ओयामबाट एसएलसी पास गरेपछि लोकसेवा आयोगबाट नाम निकाली सिद्देश्वरी प्राविमा शिक्षिका बनिन् । त्यसो त उनी ओयामबाट एसएलसी उत्तीर्ण गर्ने पहिलो महिला पनि हुन् । त्यसपछि उनले कलिलै उमेरमा धर्मभक्त प्राविमा प्रधानाध्यापकका रुपमा नेतृत्व पनि सम्हालिन् ।

ब्रिटिश सेनामा कार्यरत श्रीप्रसाद माबोसित वैवाहिक बन्धनमा बाँधिएपछि पनि उनले उच्च शिक्षालाई चटक्कै छोडिनन् । दुई छोरी र एक छोरालाई हुर्काउँदै उनले महेन्द्र रत्न बहुमुखी क्याम्पस इलामबाट आइए र पाँचथर बहुमुखी क्याम्पस फिदिमबाट बीए उत्तीर्ण गरिन् ।

गोर्खाहरुलाई बेलायत बसोबासको अवसर पाएर युके आएपछि उनले जगैबाट अध्ययनलाई निरन्तरता दिइरहिन् । उनले क्वीन म्यारी कलेज बेजिङस्टोकबाट जीसीएसइ, फार्नब्रो कलेज अफ टेक्नोलोजीबाट बायोलोजी, साइकोलोजी, सोसिओलोजी र हिस्ट्रीमा ए लेभल, डेन्टल नर्सिङमा डिप्लोमा र युनिभर्सिटी अफ सरेबाट क्रिमिनोलोजी र साकोलोजीमा स्नातक पनि गरेकी छिन् ।

आमाको पद्चिन्ह पछ्याउँदै उनी सामाजिक कार्यमा पनि सक्रिय छिन् । पाँचथर सेवा समाजको साँस्कृतिक विभाग, उपाध्यक्ष हुँदै हाल सल्लाहकार रहेकी सेलिङ किरात याक्थुङ चुम्लुङ युकेको रसमुर शाखाकी अध्यक्ष, किरात याक्थुङ महिला चुम्लुङ युकेकी अध्यक्ष समेत भइसकेकी छिन् । उनी अहिले चुम्लुङको केन्द्रीय उपाध्यक्ष छिन् । नेपाल आदिवासी जनजाति महासंघ युकेकी उपाध्यक्ष समेत रहेकी उनी बेलायतको स्थानीय चुनावमा काउन्सिलको उम्मेदवार पनि भइसकेकी छिन् । ग्रेटर रसमुर नेपाली कम्युनिटीमा महिला फोरम संयोजक भएर पनि उनले काम गरेकी छिन् ।

नेपाली र लिम्बु भाषामा साहित्य लेख्न रुचाउने सेलिङको ‘लाहुरेनी पीडा’ नामक पुस्तक पनि प्रकाशित छ ।

ब्यक्तिगत स्वार्थभन्दा सामाजिक हितका लागि दिलोज्यान दिन मन लाग्ने गरेकाले एनआरएनए युकेमा उम्मेदवारी दिएको उनको भनाइ छ । एनआरएनए युकेलाई सबै किसिमका नेपालीहरु अट्ने समावेशी थलो बनाउन पनि आफूले महिला सचिव पदमा उम्मेदवारी दिएको उनले बताइन् ।