लन्डन । गैर आवासीय नेपाली संघका केन्द्रीय उपाध्यक्ष कुल आचार्यले आउंदो अक्टोबरमा काठमाडौंमा हुन गइरहेको संघको नवौं विश्व सम्मेलनमा आफूले अध्यक्ष पदमा उम्मेदवारी दिने बताएका छन् ।
एनआरएनलाई प्रवासमा बस्ने हरेक गैर आवासीय नेपालीलाई समेट्ने गरी समावेशी र सशक्त बनाउन आफूले उम्मेदवारी दिन लागेको बताउंदै लन्डनका सफल व्यवसायी आचार्यले साथीहरुसंग सरसल्लाह गरी आफ्ना एजेन्डा छिट्टै सार्वजनिक गर्ने पनि बताए ।
केन्द्रीय अध्यक्ष भवन भट्टले गए बुधबार मध्यराती एक वक्तव्य दिंदै अब आउंदो कार्यकालका लागि उम्मेदवारी नदिने घोषणा गरेपछि आचार्यको भनाइ आएको छ । उनले अध्यक्ष भट्टको घोषणा सकारात्मक भएको बताए ।
एनआरएनए एउटा गैरराजनीतिक सामाजिक संस्था भएको बताउंदै आचार्यले अग्रजहरुसंगको सरसल्लाह र सबै साथीहरुको आग्रह र सहयोगमा आफूले अध्यक्ष पदमा उम्मेदवारी दिने निर्णय गरेको बताए ।
‘अध्यक्ष पदमा सहमतिको सम्भावना के छ ?’ भन्ने एक प्रश्नमा आचार्यले सहमतिका लागि आफू संधै खुला रहेको तर एनआरएनए जस्तो संस्थामा बन्द कोठाभित्र बसेर २-३ जनाले निर्णय गर्नु भन्दा प्रजातान्त्रिक ढंगले खुल्ला प्रतिस्पर्धाबाट नेतृत्व चयन हुनु पर्छ भन्ने आफ्नो धारणा रहेको जनाए ।
एनआरएनए एनसीसी बेलायतका पूर्व अध्यक्ष तथा एनआरएनए युरोप संयोजकको जिम्मेवारी सम्हालिसकेका उपाध्यक्ष आचार्यको संघकै अर्का केन्द्रीय उपाध्यक्ष जर्मनी निवासी व्यवसायी कुमार पन्तसंग प्रतिष्पर्धा हुने ठानिएको छ । पन्तले पनि आफू अध्यक्ष पदमा उम्मेदवारी दिन तयार रहेको बताइसकेका छन् ।
आचार्यलाई प्रजातन्त्रवादी पक्षको सहयोग रहने धेरैको ठम्याइ छ भने पन्तलाई वामपन्थी समूहले साथ दिने आंकलन गरिएको छ । इकान्तिपुर
