लन्डनको रेल स्टेशनभित्र नेपाल प्रवर्धन

लन्डन । सिटी अफ वेष्ट मिनिस्टर बरोभित्र पर्ने सेन्ट जोन्स् उडको आफ्नै ख्याति छ । कारण, ‘दि होम अफ क्रिकेट’ भनिने लर्डस् 
मैदान यसकै आसपासमा छ, जहां कयौं अन्तर्राष्ट्रिय खेल भइरहन्छ । आउंदो १४ जुलाइ आइतबार क्रिकेट वल्ड कप फाइनल खेल पनि लर्डसमै तय भएको छ ।

यतिखेर सेन्ट जोन्स् उड लन्डन अण्डरग्राउण्ड स्टेशनभित्र भित्तामा टांगिएका केही थान आकर्षक विज्ञापनले दैनिक हजारौं विदेशी यात्रुको ध्यान आकृष्ट गरिरहेको छ । नेपाल भ्रमण वर्ष २०२० को 
प्रवर्धनसहित राखिएका ति विज्ञापनमा नेपालको सर्वोच्च शिखर सगरमाथा, मठ मन्दिर, रयाफटिङ र शिल्पकलाको अदभूत नमुना झल्कन्छ ।

बेलायतमा लन्डन अण्डरग्राउण्ड एडभर्टाइजिङ अर्थात ट्युब एडभर्टाइजिङ विज्ञापनको प्रभावकारी माध्यम मानिन्छ किनकि एकैदिन लाखौंको नजरमा पर्छन् त्यहां टांगिने बीलबोर्ड विज्ञापन । राष्ट्रिय अन्तर्राष्ट्रिय कम्पनीहरुले आफ्नो ब्राण्ड स्थापित गर्न पनि यस्तै माध्यम अपनाउंछन् ।

तर, विज्ञापनमा बुद्ध भनेर टांगिएका मुर्ति भने नेपालको नभइ थाइल्याण्डको भएको भन्दै सामाजिक सञ्जालतिर आलोचना 
भएपछि यसलाई हटाइएको बताइएको छ ।

ति अति महंगा विज्ञापन कसले राख्यो भन्नेबारे लन्डनस्थित नेपाली दूतावास भने बेखवर छ । ‘नेपाल पर्यटन बोर्ड र दूतावासलाई यसबारे केही थाहा छैन्’, दूतावासका उपनियोग प्रमुख शरदराज आरणले भने, ‘बुद्ध भनेर राखिएका चित्र अन्तै देशको भएको बुझिएकाले यसले झन् भ्रम सृजना गरयो । जसले राखे पनि नेपाल सम्बन्धि सामाग्री राख्दा एकपटक दूतावास वा पर्यटन बोर्डसंग अनुमति लिनु पर्दथ्यो ।’

नेपाल भ्रमण गर्ने बेलायती पर्यटक संख्या वृद्धि भइरहंदा यसले थप टेवा पुग्ने धेरैको विश्वास छ । बेलायतबाट गत वर्ष सन् २०१८ मा ६३ हजार ८६ बेलायती पर्यटक नेपाल भ्रमणमा गएको तथ्यांक छ । नेपाली राजदूत डा. दुर्गाबहादुर सुवेदी यस वर्ष ८० हजार र नेपाल भ्रमण वर्ष २०२० मा एक लाख बेलायती पर्यटक नेपाल भित्रयाउने तयारीमा आफूहरु लागेको दावी गर्छन् ।

‘नेपाल भ्रमण वर्ष २०२०’ अभियान सफल बनाउन दूतावासले पहल थालिसकेको छ । राजदूत डा. सुवेदीको अध्यक्षतामा एक उच्चस्तरिय समिति समेत बनाइएको छ । पर्यटन अर्थतन्त्रको प्रमुख मेरुदण्ड भएकाले बेलायतबाट सक्दो सहयोग गर्ने प्रतिवद्धता दूतावासको छ ।