लन्डनमा नेपालीको पोस्ट अफिस


लन्डन । बेलायतस्थित युवा उद्यमी कृष्ण तिवारीले वर्ष दिन अगाडि देखि सञ्चालन गरिरहेको पोस्ट ‘रेनर्सलेन पोस्ट अफिस’ (मेन) को औपचारिक उद्घाटन गरिएको छ ।

नेपाली राजदूत डा. दुर्गाबहादुर सुवेदीले बिहीबार सांझ रेनर्सलेनस्थित उक्त पोस्ट अफिस रिबन र केक काटेर उद्घाटन गरेका हुन् । सो अवसरमा व्यवसायिक सफलताका लागि पूजाआजा पनि गरियो । उद्घाटनपछि राजदूत सुवेदीले बेलायमा नेपालीले विभिन्न क्षेत्रमा आफ्नो सीप र लगानी विस्तार गरिररहेकामा खुशी व्यक्त गर्दै तिवारीलाई बधाइ दिए ।

एक वर्षको गृहकार्यपछि तिवारीले गत वर्ष एक लाख ९२ हजार पाउण्ड (करिब तीन करोड रुपैयां) मा ‘रेनर्सलेन पोस्ट अफिस मेन’ किनेका थिए । स्थानीय मेयर, नेपाली डायस्पोराका कम्युनिटी लिडर र परिवारबीच 
उद्घाटन समारोह गरिएको थियो ।

त्यही सांझ ब्लु रुम स्पोर्टस् ब्यांक्यूटिङ हलमा आयोजित रात्री भोजमा सञ्चालक तिवारीले आफ्नो व्यवसायिक सफलतामा समस्त कर्मचारी, परिवार र शुभेच्छुकको साथ रहेको बताउंदै आभार व्यक्त गरे । पोस्ट अफिसबाट चिठी, डकुमेन्ट्ससहित सबै प्रकारका सामान विश्वभर पोस्ट, ब्रिटिश पासपोर्ट ‘चेक एण्ड सेन्ड’, ‘आइडी भेरिफिकेसन’, बैंकिङ कारोवार, मोर्गेज, ब्रोड ब्याण्ड, मोबाइल फोन-ल्यापटप पार्टस् विक्री तथा मर्मत, टिएफएल सर्भिस, डिभिएलए, रिडाइरेक्सन, मनी ग्राम सेवा, इन्सुरेन्स, पेन्सन, लोटरी, फोटो आदि गरि ९० भन्दा बढि विभिन्न सेवा उपलव्ध भएको तिवारीले जानकारी दिए । ३७० वर्षको इतिहास बोकेको पोस्ट अफिस ‘ब्राण्ड’ को फ्रेन्चाइज लिन पाउंदा आफू भाग्यमानी भएको तिवारी बताउंछन् ।

सो अवसरमा एनआरएनए उपाध्यक्ष कुल आचार्यले बेलायतमा नेपालीहरु अब रेष्टुरेन्ट वा ग्रोसरी जस्ता व्यवसायमा मात्र सिमित नभइ अन्य क्षेत्रमा पनि लगानीको दायरा फराकिलो बनाउंदै लैजानु गर्वको कुरा भएको बताए । आचार्यले तिवारीलाई बधाई दिंदै एनआरएनएले प्रवासमा रहेका लाखौं नेपालीलाई लगानी, ज्ञान-सीप हस्तान्तरण र मातृभूमिको विकासमा उत्प्रेरित गरिरहेको पनि उल्लेख गरे । कार्यक्रममा पोस्ट अफिसका अध्यक्ष मिक फेयर र तिवारीकी जीवनसंगिनी इन्दिरा बस्यालले पनि मन्तव्य राखेका थिए ।

कार्यक्रममा पोस्ट अफिसको तर्फबाट उत्कृष्ट कर्मचारीहरुलाई सम्मान गरियो । सहभागीलाई नेपालका लोकप्रिय गायक कुलेन्द्र बिकले गायनमार्फत मनोरन्जन दिलाएका थिए ।

गत वर्ष २९ मे देखि सञ्चालनमा आएको हो पोस्ट अफिस । पोस्ट अफिस ’मेन’ बेलायतमा नेपालीले किनेकामध्ये पहिलो भएको तिवारीले बताए । सानो स्केलमा पोस्ट अफिस (लोकल) सञ्चालन 
गर्ने बेलायतमा तीन जनामात्र नेपाली रहेको बताइन्छ ।

तस्विर- शिव भण्डारी

प्रतिक्रिया

सम्बन्धित सामाग्री