लन्डनमा प्रधानमन्त्री ओलीलाई कालो झण्डा देखाउने प्रचार भ्रामक – सत्याग्रह

लन्डन । गोर्खा सत्याग्रह संयुक्त संघर्ष समितिले नेपालका प्रधानमन्त्री केपी ओली लन्डन आउंदा विरोधस्वरुप कालो झण्डा देखाउने भन्ने हल्ला निराधार र भ्रामक भएको स्पष्ट पारेको छ । बरु प्रधानमन्त्री ओली लन्डनमा आउंदा भव्य स्वागत गर्ने आफूहरुको योजना रहेको सत्याग्रह समितिका निर्देशक ज्ञानराज राईले बताए । ‘गेसो समर्थक केही साथीहरुले हामीले सम्माननीय प्रधानमन्त्रीको भ्रमणका क्रममा कालो झण्डा देखाउने तयारी गरेको भनेर भ्रामक हल्ला फैलाइरहेका छन्’, राईले प्रष्टयाए, ‘त्यो सरासर गलत र निराधार हो । हामी उहांलाई लन्डनमा स्वागत गर्न आतुर छौं ।’ प्रधानमन्त्री ओली १० जुनमा तीन दिने बेलायत भ्रमणका लागि यहां आउने तय भएको छ ।

गेसो अध्यक्ष कृष्णकुमार राईले सत्याग्रहको आन्दोलन ‘अराजक’ भएको र त्यसमा आफूहरुको समर्थन नरहने बताएपछि यी दुई समूहबीच सम्बन्ध चिसिएको छ ।

गोर्खा अभियन्ता राईले बेलायती प्रधानमन्त्री टेरेजा मे र प्रधानमन्त्री ओलीबीच ११ जुनमा वार्ता हुनुअघि प्रधानमन्त्री ओलीसंग आफूहरुले वार्ता गर्ने तयारी गरेको जानकारी दिए । ‘प्रधानमन्त्रीसंगको भेटवार्तामा राख्ने एजेण्डाबारे वुद्धिजिवीहरुसंग परामर्श भइरहेको छ । हामी नेपाल सरकारले उच्चस्तरिय वार्ता कमिटी गठन गरेर भूपू गोर्खा समस्या समाधान गरोस् भन्ने माग प्रधानमन्त्री समक्ष राख्ने सोचमा छौं’- राईले भने ।

बेलायतले आफूहरुलाई वर्षौंदेखि भेदभाव गरेको गुनासो भूपू ब्रिटिश गोर्खाहरुको छ । उनीहरुले अंग्रेज सैनिक सरह समान पेन्सन र अन्य सुविधा माग गर्दै आएका छन् ।