लण्डन । बर्न्टओक नेपाली समाजले एक कार्यक्रम आयोजना गरी गत साता लन्डन बरो अफ बार्नेटको उपमेयर पदमा निर्वाचित काउन्सिलर लक्ष्य गुरुङलाई सम्मान गरेको छ ।
समाजका अध्यक्ष उदय गुरुङको सभापतित्वमा नर्थ रोड कम्युनिटी सेन्टरमा बुधबार बेलुका आयोजित एक समारोहमा उपमेयर गुरुङ तथा श्रीमती शोभा गुरुङलाई सम्मान गरिएको थियो ।
सो अवसरमा बोल्दै नवनिर्वाचित उपमेयर गुरुङले गत वर्ष बार्नेट बरोको काउन्सिलर पदमा निर्वाचित भए यता आफुले धेरै कुरा सिक्ने मौका पाएको बताए । उनले आफ्नो निर्वाचनलाई नेपालीको पहिचानको रुपमा आफुले लिएको बताए । उनले नेपाली युवाहरुलाई अगाडी बढ्न प्रेरणा मिलोस् भनेर आफु स्थानीय राजनीतिमा आएको बताउंदै युवाहरुलाई रचनात्मक कामहरुको नेतृत्व गर्न आग्रह गरे । उनले आफ्नो जित नेपाली समाजको जित हो भन्दै नेपाली समुदायको हितको लागि सक्दो काम गर्ने पनि बताए ।
समाजका अध्यक्ष उदय गुरुङले बेलायतमा बसोबास गरिरहेका नेपालीहरु राजनीति, व्यापार, शिक्षा लगायत सबै क्षेत्रमा अगाडी बढिरहेको र त्यो गौरवको विषय भएको बताए । उनले नेपाली बालबालिकाहरुले पठनपाठनमा राम्रो गरिरहेको बताउंदै युवाहरुलाई हरेक क्षेत्रमा अगाडी बढाउन समाजले प्रयास गरिरहेको जनाए ।
शुभकामना दिंदै बर्न्टओक आमा समूहकी उपाध्यक्ष दिलमाया गुरुङले काउन्सिलर गुरुङको कामको मूल्यांकन गरेरै उहाँलाई उपमेयरको जिम्मेवारी दिइएको बताइन् । उनले स्थानीय नेपाली समाजका समस्या समाधान गर्नेतर्फ उपमेयर गुरुङले पहल गर्ने आफुहरुले विश्वास लिएको पनि बताइन् ।
सोही अवसरमा हालै बेलायतबाट संचालित समाचार पोर्टल ‘२४ न्युज प्रेस डटकम’ को पहिलो वार्षिकोत्सवका अवसरमा ‘युके जर्नलिस्ट अवार्ड २०१९’ बाट सम्मानित समाजका मिडिया संयोजक भगीरथ योगीलाई पनि सम्मान गरिएको थियो ।
सो अवसरमा बोल्दै पत्रकार योगीले सदस्यहरुको सुःख दुःखमा साथ दिन नै समाज चाहिएको बताए । उनले बर्न्टओक नेपाली समाजसंगको सहकार्यमा नेपाली भाषा तथा सांस्कृतिक केन्द्रले बालबालिकाका लागि नेपाली कक्षा सञ्चालन गरिरहेको र समाजको युवा समूहले नेपाली नयां वर्षको अवसरमा भव्य कार्यक्रम आयोजना गरेको बताए ।
कार्यक्रम सञ्चालन गर्दै समाजका महासचिव भोला पनेरुले नेपाली रास्ट्रियताले हामी सबैलाई एउटै मालामा उनीराखेको छ भन्दै उपमेयर गुरुङको जित सबै नेपालीको जित भएको बताए । सो अवसरमा बर्न्टओक आमा समूहले चियापान व्यवस्था मिलाएको थियो ।
