बेलायतको लिभरपुलमा घन्कियो नेपाली पञ्चेबाजा 

लन्डन । युरोपकै पुरानो सांस्कृतिक राजधानी भनेर चिनिने बेलायतको मर्सीसाइडस्थित लिभरपुलमा सोमबार दिउंसो धुमधाम संग नेपाली पञ्चेबाजा घन्कियो । उक्त सांस्कृतिक कार्यक्रम आयोजना बेलायतमा भर्खरै उदाएको नेपाली सांस्कृतिक समाज 
(एनसीएस) युकेले गरेको थियो ।

परम्परागत एवं मौलिक नेपाली संस्कृतिलाई विदेशमा आकर्षक तरिकाले चिनाउने हेतुले लिभरपुल शहरमा कार्यक्रम गरिएको आयोजक तथा नेपाली सांस्कृतिक समाजका संस्थापक अध्यक्ष गोपाल अधिकारीले बताए ।

सोही मौकामा भिजिट नेपाल २०२० लाई समेत लक्षित 
गर्दै आइरिस कल्चर सेन्टरमा नौमति बाजा प्रदर्शन गरियो । यसअघि विश्वभरका पर्यटकहरु झुम्मिने म्यूजियम अफ लिभरपुल डबलीमा पञ्चेबाजा बजाउने योजना भने अनुमति नभएपछि सफल हुन पाएन ।

कार्यक्रममा नेपाली समुदाय तथा स्थानीय बेलायती समुदायको पनि उल्लेखनीय उपस्थिति रहेको नेपाली सांस्कृतिक समाजकी महासचिव कृष्णा गुरुङले जनाइन् ।

वीराल काउन्सिलमा ‘हेल्थ एण्ड सोसियल वर्क’ सम्बन्धी काम गर्दै आएका अर्का समाजसेवी लाहुरे धन गुरुङले नौमतीबाजा जस्तो परम्परागत नेपाली लोक मौलिक धुन विदेशी समुदायमाझ 
बजाउंदा यसले दुवै समुदायबीच ‘सोसियल कोहीजन’ र सामुदायिक अन्तरसम्बन्ध (कम्युनिटी 
इन्टीग्रेसन) स्थापित गराउने बताए ।

कार्यक्रममा सहभागी दुई बेलायती नागरिकले नेपाली 
नौमती बाजाको ताल एकदमै मन छुने र नाच्न प्रेरित गर्ने खालको भएको बताए ।

लिभरपुल शहर आप्रवासी र सांस्कृतिक पर्यटनका लागि चर्चित ठाउं हो । स्थानीय सांस्कृतिक धरोहर, अन्तर्राष्ट्रिय सांस्कृतिक झांकी तथा विविध पर्यटन गतिविधिका लागि लिभरपुलले सन् २००८ मा ‘युरोपियन क्यापिटल अफ कल्चर’ भन्ने टाइटल समेत पाएको थियो ।