डा. कपिल रिजाल
लन्डन । बेलायतको नेपाली समुदायमा लोकप्रिय व्यवसायी, समाजसेवी तथा म्यूजिक भिडियो निर्देशक डा. कपिल रिजालले भ्यालेन्टाइन डे अर्थात १४ फेब्रुअरीका दिन दर्शक श्रोतालाई एक सांगीतिक उपहार दिएका छन् ।
बेलायतको सरी हिथ पार्लियामेन्ट्री विजनेश क्लब (स्ट्रेन्जेज ग्यालरी) का अध्यक्ष डा. रिजाल निर्देशित म्यूजिक भिडियो ‘सुस्तरी…’ बिहीबार सार्वजनिक भएको हो । रोमान्टिक मेलोडी गीत ‘सुस्तरी’ लोकप्रिय गायिका अन्जु पन्त तथा लन्डन बस्ने उदयीमान गायक अनिश पाण्डेले गाएका हुन् । गीत रचना र कम्पोज भानु भट्टराईको छ ।
बेलायतका विभिन्न लोकेशनमा खिचिएको उक्त म्यूजिक भिडियोमा लियो ट्यांक (टंक धमला) र अब्बी रानाले अभिनय गरेका छन् । क्यामेरा जिम्मेवारी सुमन श्रेष्ठ र सह निर्देशन सुरेशराज पाठकको छ ।
गत वर्ष उनले गायक गायिका शर्मिला बर्देवा र सपनकुमार राईले गाएको गीत ‘मेरो मनमा…’ को म्यूजिक भिडियो समेत निर्देशन गरेका थिए । उक्त भिडियो सम्पादन र छायांकन मिडियाकर्मी कुशल श्रेष्ठले गरेका थिए भने अभिनय अन्जु बस्नेत र टंक धमलाको थियो ।
सफल दन्त व्यवसायी डा. रिजालले यसअघि पनि नेपाल तथा बेलायतमा कयौं म्यूजिक भिडियो निर्देशन गरिसकेका छन् । उनी छिट्टै फिचर फिल्म निर्देशन गर्ने तयारीमा समेत छन् । डा. रिजालको समेत लगानी रहेको ‘ड्रिम्स’ सफल चलचित्र मानिन्छ ।
नेपालका वरिष्ठ स्त्रीरोग विशेषज्ञ डा. भोला रिजालका सुपुत्र डा. कपिल रिजालले भूकम्प लगत्तै करिब तीन दर्जन चिकित्सक र नर्स लिएर नेपालमा स्वास्थ्य शिविर र राहत, उद्दार तथा पुनर्निर्माणमा उल्लेख्य काम गरेका थिए ।
म्यूजिक भिडियो हेर्नुहोस्-
