काठमाडौँ, १४ साउन – शहरी विकासमन्त्री मोहम्मद इस्तियाक राई र नेपालका लागि जापानी राजदूत मासामिचि साइगोबीच आज शिष्टाचार भेटवार्ता भएको छ ।
सिंहदरबारस्थित मन्त्रालयमा भएको सो भेटमा राजदूत साइगोले आफ्नो कार्यकालमा नेपालसँगको सम्बन्धलाई थप मजबुद बनाउन पहल गर्ने बताउनुभयो ।
मन्त्री राईले नवनियुक्त राजदूतका रुपमा नेपाल आएकोमा बधाई दिदैं उहाँको कार्यकालमा मन्त्रालयसँग सम्बन्धित काममा जापानको सहयोग बढ्ने विश्वास व्यक्त गर्नुभयो ।
“जापान सरकारले नेपालको आर्थिक, सामाजिक र मानवीय विकासमा पुरयाएको योगदानको नेपाल सरकारले उच्च मूल्यांकन गरेको छ, कुलेखानी जलविद्युत् आयोजना र बिपी राजमार्गले नेपालको आर्थिक, सामाजिक क्षेत्रमा पुरयाएको विकास योगदान आफैँमा विशिष्ट रहेको छ”, उहाँले भन्नुभयो ।
मन्त्री राईले काठमाडौँ उपत्यकाको सडक सञ्जालको गुरुयोजना निर्माणमा जापानी सहयोगको नेपालले उच्च मूल्यांकन गरेको बताउनुभयो ।
राजदूत साइगोले नेपालको पूर्वाधार विकास र भूकम्पपछिको पुनःनिर्माणमा जापानले इमान्दारीपूर्वक सहयोग गरेको बताउँदै मन्त्रालयसँग समन्वय गरी आगामी दिनमा दिगो पुनःनिर्माण र पूर्वाधार विकासमा थप सहयोग बिस्तार गर्ने बताउनुभयो ।
पाठक राष्ट्रिय समाचार समिति (रासस) का प्रधानसम्पादक हुन्।