काठमाडौं । गैरआवासीय नेपाली संघका अध्यक्ष भवन भट्ट नेतृत्वको एक टोलीले राष्ट्रिय सभाका अध्यक्ष सम्माननीय गणेश प्रसाद तिमिल्सिना, गृह मन्त्री राम बहादुर थापा ‘बादल’, परराष्ट्र मन्त्री प्रदीप ज्ञवाली र कानुन मन्त्री शेर बहादुर तामाङ्गसंग छुट्टा छुट्टै भेट गरी संविधानमा भएको गैरआवासीय नेपाली नागरिकताको व्यवस्था लागू गर्नका लागि आवश्यक कानुनहरु यथाशक्य छिटो ल्याउने व्यवस्था मिलाउन अनुरोध गरेको छ ।
भेटघाटका अवसरमा अध्यक्ष भट्टले विश्वभरी छरिएर रहेका नेपालीलाई नेपालसंग जोड्ने र नेपालको समृद्धिका लागि गरिने काममा साझेदार बनाउने पवित्र उद्देश्यका साथ अघि बढेको गैरआवासीय नेपाली संघले एक पटकको नेपाली सधैंको नेपाली भन्ने भावनालाई आत्मसाथ गरेको बताए । उनले नेपालको संविधानले गरेको गैरआवासीय नेपाली नागरिकता सम्बन्धी व्यवस्था शीघ्र कार्यान्वयनका लागि अनुरोध समेत गरे ।
संघका उपाध्यक्ष कुल आचार्यले संविधानको व्यवस्था कार्यान्वयनका लागि ऐन नियमको तर्जुमा आवश्यक भएको र सरकारका सम्बन्धित निकायले ऐनको तर्जुमा गरिरहेको भन्ने बुझिएकाले ऐनमा संविधानको भवाना अनुसार व्यवस्था गरिदिन, प्रकृयाहरु प्रष्ट तोकिदिन र भविष्यमा व्यक्तिपरक व्याख्या हुन सक्ने अवस्था आउन नदिने गरी कानुन बनाइदिन अनुरोध गरेका थिए । साथै उनले त्यस्तो नागरिकता पाउने व्यक्तिले अन्य नेपाली नागरिक सरह आर्थिक सामाजिक एवं साँस्कृतिक अधिकार उपभोग गर्ने र अरु नेपाली नागरिक जस्तै देश विदेशमा समेत नेपाल सरकारले प्रदान गर्ने राहदानी बोकेर हिंड्न पाउने व्यवस्था गरिदिन समेत अनुरोध गरे ।
भेटमा संघका सह-कोषाध्यक्ष सोम सापकोटाले गैरआवासीय नेपालीबाट मुलुकले फाइदा लिनसक्ने भएकोले सम्बन्ध तोड्ने होइन जोड्नका लागि पहल गर्नु पर्ने धारणा राखे ।
भेटघाटमा गैरआवासीय नेपाली संघको तर्फबाट संघको आयोजनामा अमेरिकाको सान्फ्रान्सिस्कोमा हुन लागेको क्षेत्रीय विज्ञ सम्मेलन, लग्जेम्वर्गमा हुने युरोपियन क्षेत्रीय बैठक तथा महिला भेला र काठमाडौंमा हुने विश्वव्यापी विज्ञ सम्मेलन आदिका बारेमा समेत जानकारी गराइएको संघले जनाएको छ । भेटमा वैदेशिक रोजगारीमा गएकाहरुको समस्याबारे पनि जानकारी गराइएको थियो ।
