मेडस्टोन कम्युनिटी मेलाको सहयोगार्थ गोर्खा किचनमा च्यारिटी

लन्डन । बहुसांस्कृतिक महोत्सवका रुपमा लिइने मेडस्टोन कम्युनिटी मेला यस वर्ष २२ जुलाइ आइतबार वाटम्यान पार्क मेडस्टोनमा गर्ने तयारी भएको छ । नेपालीसहित १० भन्दा बढि समुदायको प्रत्यक्ष संलग्नता रहने १४ औं उक्त मेलामा विभिन्न समुदायका कला, संगीत, भेषभुषा, खाना प्रदर्शनी मुख्य आकर्षण रहने बताइएको छ । मेलामा ५ देखि १० हजारसम्म दर्शक सहभागी हुने अपेक्षा छ ।

उक्त मेला आयोजनाका लागि खर्च जुटाउन गत २१ मेमा गोर्खा किचनले एक फण्ड रेजिङ च्यारिटी आयोजना गरेको छ । उक्त च्यारिटीबाट ५ सय पाउण्ड संकलन गरि हस्तान्तरण गरिएको गोर्खा किचेनका सञ्चालक जीवन अधिकारीले जनाए । केन्ट कोहीजन प्लसले आयोजना 
गर्दै आएको उक्त मेलाका लागि यस वर्षदेखि मेडस्टोन 
बरो काउन्सिलले आर्थिक सहयोग नगर्ने भएपछि विभिन्न च्यारिटी गरि अर्थ संकलन गरिंदैछ । गोर्खा किचनले थोरै भएपनि सहयोगी भावना दर्शाएको हो ।

च्यारिटी डिनरका लागि मेडस्टोन मेयर डेभिड नाघी पहिलो पटक गोर्खा किचनमा सरिक भए । मेयर निर्वाचित भएपछि नाघीको गोर्खा किचनमा पहिलो प्रवेश भएर मेयर डेभिडलाई गोर्खा किचनका तर्फबाट जीवन अधिकारी र विश्वप्रताप सिंहले विशेष स्वागत सम्मान गरेका थिए ।

च्यारिटी डिनरमा स्थानीय नेपाली अगुवा एवं विदेशी राजनीतिज्ञहरुको सहभागिता थियो । कार्यक्रममा केन्टका डेपुटी लोर्ड डा. भरगवा वासुदेव, केन्ट काउन्टी काउन्सिलर इरिक हट्सन, मेडस्टोन बरो काउन्सिलका काउन्सिलरहरु म्याट बर्टन र डेभिड बर्टन, मेडस्टोन नेपलिज कम्युनिटीका अध्यक्ष रिटायर्ड मेजर दुध गुरुङ, संस्थापक अध्यक्ष रत्न लिम्बु, सचिव मोहन गुरुङ, खेल संयोजक झपट भुजेल, संस्थापक सदस्य पदम थापा लगायत सहभागी थिए ।

मेला सफल बनाउन केन्ट कोहीजन प्लसका निर्देशक 
गुरवीन्दर सन्धेर र उपाध्यक्ष दिनेश खड्का लागिरहेका 
छन् । यसलाई नेपाली समुदायले पनि साथ दिएको छ ।