राजदूत डा. सुवेदीद्वारा माल्टाका राष्ट्रपति समक्ष ओहदाको प्रमाणपत्र पेश

लन्डन । संयुक्त अधिराज्यका लागि नेपाली राजदूत  तथा गणतन्त्र माल्टाका लागि नवनियुक्त गैरआवासीय राजदूत महामहिम डा. दुर्गा बहादुर सुवेदीले १७ मे  २०१८ का दिन गणतन्त्र माल्टाका महामहिम राष्ट्रपति श्रीमती Marie- Louise Coleiro Preca समक्ष आफ्नो ओहदाको प्रमाणपत्र पेश गर्नु भएको छ । राजदूत डा. सुवेदीले माल्टाको राजधानी भालेटास्थित राष्ट्रपति भवनमा आयोजित एक विशेष समारोहमा ओहदाको प्रमाणपत्र पेश गर्नु भएको हो ।

उक्त विशेष समारोहमा राजदूत सुवेदीले सम्माननीय राष्ट्रपति श्रीमती विद्यादेवी भण्डारीवाट माल्टाका राष्ट्रपतिको व्यक्तिगत सुख र सुस्वास्थ्यका साथै माल्टाका मैत्रीपूर्ण जनताको निरन्तर प्रगति, शान्ति, एवं समृद्धिका लागि पठाउनु भएको शुभकामना सन्देश प्रस्तुत गर्नुभयो । त्यसैगरी राजदूत डा. सुवेदीले सम्माननीय प्रधानमन्त्री के. पी. शर्मा ओलीवाट माल्टाका महामहिम राष्ट्रपति, माल्टा सरकार र जनताप्रति नेपाल सरकार र  नेपाली जनताको शुभेच्छा र शुभकामना व्यक्त गर्नुभयो ।

माल्टाका महामहिम राष्ट्रपति श्रीमती Preca ले महामहिम राजदूत डा. सुवेदीको ओहदाको प्रमाणपत्र ग्रहण गर्नुहुँदै गणतन्त्र माल्टाका लागि नेपालको असाधारण तथा सर्वाधिकारसम्पन्न राजदूत नियुक्त हुनु भएकोमा डा. सुवेदीलाई वधाई दिनुभयो । सो अवसरमा महामहिम राष्ट्रपतिले माल्टाका लागि राजदूतका रुपमा डा. सुवेदीको कार्यकालको सफलताको कामना गर्नुहुदै दुई मुलुकबीचको द्धिपक्षीय सम्बन्ध थप सुदृढ र सुमधुर हुने विश्वास व्यक्त गर्नुभयो ।

उक्त अवसरमा महामहिम राष्ट्रपति श्रीमती Preca ले नेपालका सम्माननीय राष्ट्रपतिश्रीमती विद्या देवी भण्डारीको व्यक्तिगत सुख र सुस्वास्थ्यका साथै नेपाली जनताको निरन्तर शान्ति, प्रगति एवं समृद्धिका लागि शुभकामना सन्देश सम्माननीय राष्ट्रपतिसमक्ष पुर्याइदिन राजदूत डा. सुवेदीलाई आग्रह गर्नुभयो।

नेपालमा स्थानीय, प्रादेशिक र संघीय तीनै तहका निर्वाचन शान्तिपूर्वक र सफलतापूर्वक सम्पन्न भएकोमा नेपाली जनतालाई बधाइ ज्ञापन गर्नुहुँदै गणतन्त्र माल्टाका महामहिम राष्ट्रपतिले यसले नेपालको लोकतान्त्रिक, समावेशी र सर्वस्वीकार्य संविधानको कार्यान्वयनका साथै नेपालको सामाजिक र आर्थिक विकासका निम्ति मार्ग प्रशस्त गरेको धारणा व्यक्त गर्नुभयो । राष्ट्रपति Preca ले द्धिपक्षीय सहयोगको अभिवृद्धिले दुई मुलुकबीच रहेको मैत्रीपूर्ण सम्बन्ध भविष्यमा अझ प्रगाढ हुने विश्वास समेत व्यक्त गर्नु भयो ।

आफ्नो ओहदाको प्रमाणपत्र पेश गर्नुहुँदै राजदूत सुवेदीले नेपालको वर्तमान राजनैतिक, सामाजिक र आर्थिक विकासबारे संक्षिप्तमा प्रकाश पार्नुभयो । नेपालमा सफलतापूर्वक स्थानीय, प्रदेश र संघीय संरचनाको निर्वाचन सम्पन्न भई संघीय, सातै प्रदेश र सातसय त्रिपन्न स्थानीय सरकारको गठनले नेपालको लोकतान्त्रिक, समावेशी र नागरिक अधिकार सम्पन्न संविधानको पूर्ण कार्यान्वयन भएको बताउनु हुँदै राजदूत डा. सुवेदीले यसले लामो राजनीतिक संक्रमण अन्त्य गर्नुका साथै एकात्मक संरचनाबाट शासन व्यवस्था संघीय संरचनामा संस्थागत भएको विचार व्यक्त गर्नुभयो ।

संसदमा बहुमत प्राप्त स्थायी सरकारको निर्माण र विकासको लक्ष्य निर्धारणबाट नेपाली जनतामा समृद्ध र उज्यालो भविष्यप्रति आशा र विश्वास जागेको छ भन्नुहुँदै राजदूत डा. सुवेदीले वर्तमान सरकारको समृद्ध नेपाल र सुखी नेपालीको आदर्शलाई  अंगीकार गरेको र सो आदर्श राष्ट्रियता, लोकतन्त्र र आधारभूत स्वतन्त्रता, सामाजिक न्याय, स्थिरता, प्रगति र विकास, सुशासन र संक्रमणकालको अन्त्यमा आधारित रहेको छ भनी प्रष्ट पार्नु भयो ।

नेपाल सरकारका तर्फबाट गणतन्त्र माल्टा सरकार र जनतालाई नेपालको विकास प्रयासमा प्राप्त सदाशयता र सहायताका लागि आभार व्यक्त गर्नहुँदै राजजदूत महामहिम डा. सुवेदीले आफ्नो कार्यकालमा नेपाल र माल्टाबीचको विद्यमान मैत्रीपूर्ण द्धिपक्षीय सम्बन्ध थप उचाइमा पुर्याउने अपेक्षा व्यक्त गर्नु भयो ।

उक्त विशेष समारोहमा राष्ट्रपति कार्यालयका Chief of the Staff, H.E. Mr. John Camilleri, परराष्ट्र मामिला तथा व्यापार प्रवर्द्धन मन्त्रालयका महानिर्देशक महामहिम श्रीमती Maria Calleja, सम्माननीय राष्ट्रपतिका सचिव महामहिम Carmell Briffa र माल्टा सरकारका शिष्टाचार महापाल Mario Buttigieg को उपस्थिति थियो ।

प्रतिक्रिया

सम्बन्धित सामाग्री