सिंगापुरमा सफलता चुम्दै नेपाली

लन्डन । दक्षिण एसियाली मुलुकबाहेक विदेशमा रहेका नेपालीहरुलाई प्रतिनिधित्व गर्ने ठानिएको गैर आवासीय नेपाली संघको शाखा अहिले ७८ देशमा फैलिएको छ । झण्डै ३० लाख बढि नेपाली विदेशमा रहेको अनुमान छ । विदेशमा रहेका नेपालीले सफलता चुमेका कयौं उदाहरण छन् र ती मध्ये एक हुन् विश्वप्रकाश गिरी । गैर आवासीय नेपाली संघ, सिंगापुरका अध्यक्ष गिरी केही अघि लन्डनमा भेटिए होलिडे मनाउन आउने सिलसिलामा ।

बझांगमा जन्मिएका गिरी सन् १९९३ मा अध्ययनका लागि सिंगापुर पुगे । पढाइ सकेर नेपालमै केही गरौं भन्ने सोचले सन् १९९६ मा नेपाल फर्किए उनी । त्यतिबेला नेपालमा भर्खर बहुदल आएको थियो । आम जनता परिवर्तन चाहन्थे । गिरीलाई पनि देशमा अब त केही होला भन्ने आशा थियो । तर यस विपरित राजनीतिक अस्थिरता, नियम कानुनको अभाव अनि व्यापार व्यवसाय र रोजगारीको वातावरण पर्याप्त नदेखेपछि उनी फेरि फर्किए सिंगापुर ।

सिंगापुरमा फुड कोर्टबाट शुरु गरेको उनको व्यवसाय अहिले सर्वत्र फैलँदै छ । उनको त्यहां तीनवटा रेष्टुरेन्ट शिशमहल, अल्बर्ट क्याफे एण्ड रेष्टुरेन्ट र पार्क क्याफे एण्ड रेष्टुरेन्ट सञ्चालित छन् । पार्टनरसीपमा थ्री स्टार होटल समेत खोलेका छन् गिरीले । गिरीले 
करिब ५० जनालाई रोजगारी दिएको बताए । कामप्रतिको लगाव र इमान्दारिता नै उनले सफलताको कारक मानेका छन् । यद्यपि जनशक्ति अभाव व्यापार व्यवसायमा चुनौती बनेको उनको बुझाइ छ ।

सिंगापुर नेपालीका लागि पनि एउटा पर्यटकीय गन्तव्य र सपनाको देश हो । सिंगापुरमा पुलिस फोर्समा समेत कार्यरत गरी करिब ७ हजार नेपाली रहेको अनुमान गिरीको छ । विशेषगरी आइटी क्षेत्रमा नेपालीले प्रगति गरिरहेको गिरीको बुझाइ छ । त्यहींको नागरिकता लिएका नेपाली परिवार त करिब १५ जतिमात्र रहेको उनी बताउंछन् । नेपाली बच्चाहरुको लागि समाजको अग्रसरतामा फुटसल खेलको व्यवस्था गरेको छ ।

बेलायत जस्तो सयौं नेपाली संघसंस्था अस्तित्वमा छैनन् सिंगापुरमा । एकमात्र नेपाली संस्था छ नेप्लीज सोसाइटी सिंगापुर, त्यसले नै एनआरएनको पनि प्रतिनिधित्व गर्दछ । गैर आवासीय नेपाली संघ सिंगापुरले स्वदेशका लागि मात्र होइन, त्यहीं जन्मे हुर्केका वालवालिकाका लागि नृत्य कक्षा शुरु गरिरहेको छ भने नेपाली भाषा सिकाउने 
चरणमा छ । नयां पुस्तालाई नेपालप्रति समर्पित गराइराख्न चुनौती देख्छन् गिरी । संघले प्राकृतिक विपत्तिमा स्वदेशका लागि काम 
गर्दै आएको छ । भूकम्प लगत्तै पीडितको सहयोगमा पनि संघले उल्लेख्य काम गरेको गिरीले बताए ।

सिंगापुरमा उच्च सुरक्षा छ । विदेशीहरुले कहिल्यै असुरक्षा र भेदभाव सामना गर्नुपर्दैन । ब्रिटिश सिस्टम अनुशरण गरेको बताउंछन् उनी ।

सिंगापुरमा राजनीतिक स्थिरता छ । विकासको जड राजनीति भएकाले नेपाली राजनीतिमा पनि राम्रा मानिस 
जानुपर्ने देख्छन् उनी ।

कस्तो मुलुक हो सिंगापुर ?

सिंगापुर एउटा संसदीय गणतान्त्रिक मुलुक हो । झण्डै ५६ लाख जनसंख्या भएको सिंगापुरका प्रधानमन्त्री लि सुन लुङ हुन्। यो विश्वकै वित्तीय केन्द्रको रुपमा प्रसिद्ध छ ।

विश्व बैंकका अनुसार सन् १९६० मा सिंगापुरको प्रतिव्यक्ति आय २,५२९ अमेरिकी डलर थियो । सन् २०१६ मा त्यहांको प्रतिव्यक्ति आय ८५,०५५ डलर पुगेको थियो ।

एउटा असल शासक लि क्वानले मलेसियाबाट टुक्रिएको सानो टापुलाई एकै पुस्तामा एउटा अविकसित राष्ट्रबाट विश्वकै विकसित राष्ट्रहरुमध्ये एक बनाए । लिले सन् १९९० सम्म ३० वर्ष मुलुकलाई नेतृत्व दिएका थिए ।

भ्रष्टाचार विरुद्ध शून्य सहनशीलताको नीति अपनाउँदै उनले सिंगापुरलाई एउटा अनुशासित मुलुकको रुपमा उभ्याए । ‘अहिले पनि सिंगापुरमा चुईंगममाथि प्रतिवन्ध लगाइएको छ र सार्वजनिक शौचालय प्रयोग गरिसकेपछि त्यसलाई सफा नगरेमा तपाईं सजायभागी हुनुहुन्छ’, गिरीले भने ।

संसारकै वित्तीय केन्द्रको रुपमा नाम कमाएको सिंगापुर विदेशी लगानीकर्ताहरुकालागि एक आकर्षक केन्द्र पनि हो ।

‘नेपालमा पनि लामो समय पछि हामीले एउटा स्थिर सरकार पाएका छौं । अब देशभित्रै रोजगारी सिर्जना गर्न र विदेशी लगानी भित्रयाउन सरकारले भरपर्दो पहल गर्नुपर्छ । समृद्ध नेपाल बनाउने अभियानमा हातेमालो गर्न सबै गैरआवासीय नेपाली तयार छन्’, उनले भने ।