लन्डनमा चौंथो बुद्ध शान्ति पदयात्रा

लन्डन । दक्षिणपूर्व क्षेत्रीय तमुधिं लन्डनले गत १२ मे २०१८ का दिन २५६२ औं बुद्ध जयन्ती शान्ति पदयात्रासहित मनाएको छ । प्रत्येक वर्ष हुंदै आएको वुद्ध शान्ति पदयात्राको यो चौंथो श्रृंखला हो ।

मुलग्रेभ प्राइमरी स्कुल परिसरबाट शुरु भएको पदयात्रा उलवीच मार्केट हुँदै प्लमस्टिड पुगी पुनः कार्यक्रम स्थल मुलग्रेभ प्राइमरी स्कुल फर्केको थियो । पदयात्राका सहभागीले बुद्धवाणी अंकित ब्यानरहरु, नेपाली झण्डा, बुद्धिष्ट तथा बेलायती झण्डा बोकेर बुद्ध प्रार्थना गाएका थिए ।

कार्यक्रम संयोजक संस्थाका विशिष्ट सल्लाहकार सुमलकुमार गुरुङका अनुसार शान्ति पदयात्रामा उत्साहजनक सहभागिता रहयो । कार्यक्रममा बेलायतका धेरै संघसंस्थाबाट प्रतिनिधित्व थियो । संस्थाका अध्यक्ष श्रीचन्द्र गुरुङको अध्यक्षतामा सम्पन्न उक्त कार्यक्रमका प्रमुख अतिथि थिए नेपाली राजदूतावास लन्डनका द्वितीय सचिव लव सुवेदी ।

प्रथम चरणको कार्यक्रम समाजका महासचिव हयारी गुरुङ र दोश्रो चरणको कार्यक्रम संस्थाका सल्लाहकार योगेश गुरुङले सञ्चालन गरेका थिए । सहभागीहरूलाई संस्थाका उपाध्यक्ष सुमन गुरुङले स्वागत गर्दे आफ्नो छोटो मन्तव्य व्यक्त गरेपछि लामा गुरुद्वय लामा धरम गुरुङ र आचार्य गुरु दुर्गाले बुद्ध शरण गमनको मन्त्रजापद्वारा पूजा शुरु गरेका थिए ।

कार्यक्रम संयोजक सुमल गुरुङ, अध्यक्ष श्रीचन्द्र गुरुङ, प्रमुख अतिथि लगायत संघसंस्थाका अध्यक्ष, प्रतिनिधिहरूले द्वीप प्रज्वलन गरे पश्चात चौथो बुद्ध शान्ति पदयात्रा संयोजक गुरुङको निर्देशनमा भव्यताका साथ सम्पन्न गरिएको थियो । दिन एकदमै शीतल र पदयात्राको अन्तिम समयमा केही फाटफुट पानी पर्दा अझ शीतलता महसुस भएको सहभागीले बताए ।

हलमा फर्किसकेपछि शाकाहरी भोजन वितरण गरिएको थियो । प्रमुख अतिथिको मन्तव्य, अध्यक्षको धन्यवाद ज्ञापनपछि कार्यक्रम संयोजक गुरुङले बुद्ध शान्ति पदयात्राबारे संक्षिप्तमा प्रकाश पारेका थिए । लामा गुरुहरुबाट पुनः पूजापाठपछि प्रवचन गरेर अपरान्ह कार्यक्रम समापन भएको थियो ।