सोमबार, असोज १२ २०७७ | Mon, September 28, 2020
नेपालको समय: ०१:०१ | UK Time: 20:16

बेलायती संसदीय प्रतिनिधिमण्डलले भेट्यो ऊर्जामन्त्री

रासस
२०७५ वैशाख २४ गते ११:४६

काठमाडौँ, २४ वैशाख – बेलायती संसदीय प्रतिनिधिमण्डलले ऊर्जा, जलस्रोत तथा सिँचाइ मन्त्री वर्षमान पुनसँग भेटवार्ता गरेको छ ।

ऊर्जा मन्त्रालयमा आज भएको भेटवार्तामा द्विपक्षीय हितका विषयमा छलफल भएको हो । नेपालको संघीय संसद्को निमन्त्रणामा भ्रमणमा आएको बेलायती संसदीय प्रतिनिधिमण्डलको नेतृत्व बेलायती सांसद नाइजल इभान्सले गर्नुभएको छ ।

भेटमा ऊर्जामन्त्री पुनले बेलायत नेपालको पुरानो विकास साझेदार मुलुक रहेको भन्दै आगामी दिनमा पनि दुवै देश बीच सुमधुर सम्बन्ध रहने विश्वास व्यक्त गर्नुभयो । उहाँले बेलायतले नेपालको शिक्षा, स्वास्थ्य र सुरक्षाको क्षेत्रमा गरेको सहयोग निकै महत्वपूर्ण रहेको बताउनुभयो ।

ऊर्जा, जलस्रोत र सिँचाइका क्षेत्रमा समेत सहकार्य गर्न सरकार तयार रहेको धारणा व्यक्त गर्दै मन्त्री पुनले ऊर्जा मन्त्रालयको १० वर्षमा १० हजार मेगावाट विद्युत् उत्पादन गर्ने योजना रहेको र त्यसका लागि राष्ट्रिय र अन्तर्राष्ट्रिय क्षेत्रको सहयोग आवश्यक रहने बताउनुभएको उहाँको सचिवालयले जनाएको छ ।

“अहिले हामीसँग एक हजार मेगावाट आसपासमात्रै बिजुली उत्पादन हुन्छ, तर हामीसँग एक लाख मेगावाट विद्युत उत्पादन गर्ने क्षमता छ । दश वर्षमा १० हजार मेगावाट बिजुली उत्पादनको लक्ष्य पूरा गर्नका लागि हामीलाई निजी क्षेत्र तथा विदेशी लगानीकर्ताको जरुरी हुन्छ” मन्त्री पुनले भन्नुभयो । उहाँले नेपालमा लगानीको वातावरण रहेको भन्दै बेलायती लगानीकर्तालाई नेपालको ऊर्जा क्षेत्रमा लगानी गर्न पनि आग्रह गर्नुभएको थियो ।

भेटमा बेलायती सांसदहरुले नेपालको जलविद्युत्, सौर्य ऊर्जा र जलस्रोतको क्षेत्रमा सरकारी नीति र योजनाबारे चासो राख्नुभएको थियो ।

बेलायती सांसद नाइजल इभान्सले नेपालको विकासमा बेलायत सहयोग गर्न तयार रहेको धारणा राख्नुभएको थियो । उहाँले बेलायत युरापेली संघबाट अलग भएपछि यस्ताखालका द्विपक्षीय भ्रमण अझै बढ्ने र त्यसले दुई देशको सम्बन्ध अझै मजबुत बन्ने बताउनुभयो ।

भेटमा बेलायती सांसदहरुले नेपालमा बिजुलीको अवस्था, जलविद्युत्ले वातावरणमा पारेको असर र त्यसको रोकथामका लागि सरकारले अघि सारेका कदमहरुका बारेमा समेत चासो राख्नुभएको थियो ।

प्रतिक्रिया

सम्बन्धित सामाग्री

फेसबुक