लन्डन । बेलायतमा बिहीबार भएको स्थानीय निर्वाचनमा तीन जना भूतपूर्व गोर्खालाई सफलता मिलेको छ । भूतपूर्व गोर्खा सैनिकहरु विष्णु गुरुङ, लक्ष्य गुरुङ र मेजर चित्र राना काउन्सिलर पदमा विजयी भएका हुन् ।
विष्णु गुरुङ र चित्र राना दोश्रो पटक काउन्सिलर निर्वाचित भएका हुन् भने अघिल्लो पटक पराजित लक्ष्य गुरुङ यसपटक सफल भए ।
गत बिहीबार इंग्ल्यान्डको १५० काउन्सिलमा ४ हजार ३७१ सिटका लागि स्थानीय निर्वाचन भएको थियो ।
बस चालक विष्णु पहिलोपटक सन् २०१४ मा काउन्सिलर पदमा निर्वाचित भएका थिए । अर्को वर्ष उनी डेपुटी मेयर भए ।
बेलायतस्थित एनआरएन अभियन्ता तथा व्यवसायी लक्ष्य गुरुङ बार्नेट काउन्सिलको हेल वार्डबाट काउन्सिलर पदमा विजयी भए । उनले तीन हजार सात मत ल्याएका थिए ।
जितपछि गुरुङले बार्नेट काउन्सिलमा थुप्रै भूतपूर्व गोर्खा परिवार बसोबास गरिरहेको बताउंदै उनीहरुका समस्या लगायत नेपाली बालबालिकाका लागि नेपाली भाषा कक्षा सञ्चालन गर्नेबारे काउन्सिलमा पहल गर्ने प्रतिवद्धता व्यक्त गरेका छन् ।
स्थानीय मतदाताको इच्छा बमोजिम सडकपेटी, पार्क सुधार, ट्राफिक व्यवस्थापन, स्थानीय स्कुलमा पठनपाठन,
चोरी समस्या समाधान आदि सम्वोधन गर्ने गुरुङको दावी छ ।
मेजर चित्र रानाले वकिङ बरोको गोल्डसवर्थ पार्क वडाबाट जम्मा दश मत बढि ल्याएर जितेका हुन् । कन्जरभेटिभ पार्टीका उम्मेदवार रानाले ९३० र उनका प्रतिष्पर्धी लिबरल डेमोक्रयाट्सका जेम्स रिचार्ड स्यान्डरसनले ९२० मत ल्याएका थिए ।
निर्वाचनको मैदानमा उत्रिएका अन्य नेपाली मुलका उम्मेदवारहरु बार्नेटको सेड वार्डमा लेबरबाट उठेका कमलबहादुर गुरुङ, फेल्थाम नर्थमा कन्जरभेटिभबाट लडेका आनन्द राई, इलिङको होबेइन वडामा कन्जरभेटिभका तर्फबाट उठेका सुरेन्द्र ढुंगाना र हार्ट डिष्ट्रिक्ट काउन्सिलको ब्ल्याकवाटर एण्ड हवली वडाबाट उठेकी लिला सेलिङ माबो भने पराजित भए ।
यसपटकको निर्वाचनमा बेलायतको प्रतिपक्षी दल लेबरले दुई हजार ३५० सिट, सत्तारुढ कन्जरभेटिभले १३३२, लिबरल डेमोक्रेटिक पार्टीले ५३६, ग्रीन पार्टीले ३९, यूकीपले ३ र अन्यले १४४ सिटमा जित हासिल गरेका छन् ।
पूर्व अनुमान विपरित लेबर टोरीज (कन्जरभेटिभ) संग लन्डनका कयौं क्षेत्रमा पराजित भएको छ । लेबर लन्डनका महत्वपूर्ण काउन्सिलहरु केन्जिङटन एण्ड चेल्सी, वान्डसवर्थ, वेष्टमिनिष्टरमा जित हासिल गर्न चुक्यो ।
गत वर्ष जुनमा ७१ जनाको ज्यान जाने गरि भएको बेलायती इतिहासकै दुःखद घट्ना ग्रेनफेल टावर आगलागीमा सरकारप्रति तीव्र आक्रोश र आलोचना रहंदा लेबरले केन्जिङटन एण्ड चेल्सीबाट जित्ने ठूलो अपेक्षा गरिएको थियो ।
तर, प्लेमाउथ र ट्राफोर्डमा जित हासिल गरेर त्यहां लेबर सबैभन्दा ठूलो पार्टी बन्न सफल भएको छ । ट्राफोर्डमा कन्जरभेटिभले १४ वर्षपछि आफ्नो अधिपत्य गुमाएको हो । टोरीजले उत्तरी लन्डनको बार्नेट काउन्सिल आफ्नो कब्जामा लियो । जुइस समुदायलाई चिढाएपछि लेबर उक्त क्षेत्रमा पराजित बन्न पुगेको विश्लेषण गरिएको छ ।
वारवीकसायरको ननिटन र बेडवर्थमा लेबरले आफ्नो पकड गुमाइ त्यहां कन्जरभेटिभले लेबरका ८ वटा सिट खोसिदिएको छ । कन्भरभेटिभले पिटरबरो, बसिलडन र डर्बीमा पनि जितेको छ ।
प्रत्येक चार वर्षमा हुने स्थानीय निर्वाचन अन्तर्गत यसपटक लन्डनको सबै ३२ बरो तथा बेलायतका ठूला शहर म्यानचेस्टर, बर्मिङहाम, लिड्स, न्यूकासल आदिमा स्थानीय चुनाव भएको हो ।
यस निर्वाचनले हयाक्नी, लुइसम, न्यूहाम, टावर हयामलेट्स, वाटफोर्ड र सेफिल्ड सिटी गरि ६ क्षेत्रमा मेयर समेत चुनेको छ ।
