लन्डन । भूतपूर्व गोर्खा सैनिक मेजर चित्र राना दोश्रो पटक काउन्सिलर विजयी भएका छन् । बिहीबार सम्पन्न बेलायतको स्थानीय निर्वाचनमा रानाले वकिङ बरोको गोल्डसवर्थ पार्क वडाबाट काउन्सिलर जितेका हुन् । कन्जरभेटिभ पार्टीका उम्मेदवार रानाले ९३० मतसहित जम्मा १० को झिनो मतान्तरले जितेका हुन् । लिबरल डेमोक्रयाट्सका जेम्स रिचार्ड स्यान्डरसनले ९२० मत ल्याएका थिए ।
यसपटकको स्थानीय निर्वाचनमा रानासहित नेपाली मुलका विष्णु गुरुङ, लक्ष्य गुरुङले पनि काउन्सिलर पद जितेका छन् । तिनै जना नवनिर्वाचित काउन्सिलर भूतपूर्व गोर्खा सैनिक हुन् ।
