पदाधिकारी मनोनयनमा देउवाको एकलौटी, उपसभापतिमा निधि र महामन्त्रीमा खड्का

काठमाडौँ-नेपाली कांग्रेसको पदाधिकारी मनोनयनमा विवादकाबीच सभापति शेरबहादुर देउवाले एकलौटी रूपमा आफूपक्षीय नेताहरूलाई मात्र मनोनयन गरेका छन् । शुक्रबार देउवाले उपसभापतिमा विमलेन्द्र निधि, महामन्त्रीमा पूर्णबहादुर खड्का र सहमहामन्त्रीमा डा प्रकाशशरण महत मनोनीत गरेका हुन् ।

मनोनयन भएका तीनै जना पदाधिकारी सभापति देउवा पक्षका हुन् । कांग्रेसका निर्वाचित पदाधिकारी एवं सदस्यको शुक्रबार बसेको बैठकमा पार्टी सभापति देउवाले उनीहरुको नाम प्रस्ताव गरेपछि बैठकले अनुमोदन गरेको केन्द्रीय सदस्य मीन विश्वकर्माले जानकारी दिए ।

बैठकमा वरिष्ठ नेता रामचन्द्र पौडेल पक्षले देउवाले एकलौटी गरेपछि उक्त निर्णयप्रति असहमति जनाएको बताइएको छ ।

कांग्रेसको विधान २०१७ को दफा २१ मा ८५ सदस्यीय केन्द्रीय समिति गठनको व्यवस्था छ । त्यसमध्ये एक सभापति, एक महामन्त्री र एक कोषाध्यक्षसहित ६४ जना निर्वाचित हुने र बाँकी सभापतिले मनोनयन गर्ने प्रावधान छ ।

विधानको सोही प्रावधानअनुसार सभापति देउवाले एक उपसभापति, एक महामन्त्री र एक सहमहामन्त्री मनोनीत गरेका हुन् ।