काठमाडौं-३३ किलो सुन तस्करी प्रकरणमा अनुसन्धानमा तानिएका नेपाल प्रहरीका डिएसपी प्रजित केसी पक्राउ परेका छन् । आइतबार केसीलाई मोरङमा बयानपछि प्रहरीले नियन्त्रणमा लिएको हो ।
केसीले अपराध महाशाखाको टोलीको नेतृत्व गर्दै सुन तस्करहरुले हत्या गरेका सनम शाक्यको शव विराटनगरको पोखरियाबाट बरामद गरेका थिए । कार्यक्षेत्र नाघेर शंकास्पद भूमिका खेलेको भन्दै यसअघि अपराध महाशाखाका प्रमुख दिवेस लोहनी, डिएसपी केसी र सईद्धय बालकृष्ण सन्जेल र गजेन्द्र रावललाई अपराध महाशाखाबाट फिर्ता बोलाइएको थियो ।
त्यसपछि केन्द्रमा रहेका केसीलाई घटनाको छानविन गर्न गठित समितिले बयानका लागि बिराटनगर बोलाएको थियो । उनी बयानका लागि शुक्रबार विराटनगर गएका थिए ।
आइतबार बयानबाट सन्तुष्ट नभएपछि छानविन समितिको आदेशमा प्रहरीले नियन्त्रणमा लिएको उच्च प्रहरी स्रोतको भनाइ छ । यसअघि अपराध महाशाखाका सईद्धय रावल र सन्जेललाई पनि प्रहरीले नियन्त्रणमा लिएर अनुसन्धान गरिरहेको छ ।
तीन जनाको शंकास्पद ज्यान जाने गरी भएको उक्त सुनकाण्डमा एक पूर्व डिआईजी गोविन्द निरौला, मकवानपुरका एसपी विकासराज खनाल पक्राउ परिसकेका छन् । यस्तै, एसपी श्याम खत्री फरार छन् भने अर्का डिएसपी सन्जय राउतसँग प्रहरीले बयान लिइरहेको छ ।
गत माघ ९ गते त्रिभुवन विमानस्थलबाट काठमाडौं भित्रिएको ३३ केजी तस्करीको सुन बाटैमा हराएपछि सुन तस्करहरुले सनम शाक्यको करेन्ट लगाएर हत्या गरेका थिए । त्यसपछि उक्त सुनकाण्डमा तानिने हाइ प्रोफाइलसहितको संख्या निरन्तर बढ्दो छ । अहिलेसम्म २८ जना पक्राउ परिसकेका छन् भने ३८ जनाको बैंक खाता रोक्का गरेर प्रहरीले खोजी गरिरहेको छ ।
सुन तस्करीका मुख्य नाइके भनिने चुडामणि उप्रेती गोरे भने फरार छन् । उनीमाथि डिफ्युजन नोटिस जारी गरेर प्रहरीले खोजी गरिरहेको छ ।
