मंगलबार, असोज १३ २०७७ | Tue, September 29, 2020
नेपालको समय: २२:०६ | UK Time: 17:21

अन्तर्राष्ट्रिय बौद्ध सम्मेलनको तयारी तीव्र

रासस
२०७५ वैशाख १२ गते २०:२६

बुद्ध जन्मस्थल लुम्बिनीमा २५६२ औं बुद्ध जयन्ती तथा अन्तर्राष्ट्रिय बौद्ध सम्मेलनको तयारीको जानकारी लिन आउनुभएका रक्षा मन्त्री इश्वर पोखरेल लुम्बिनीस्थित मायादेबी मन्दीर परिसरमा जानकारी लिनुहुँदै । तस्वीर- भरत केसी रासस, बुटवल

बुटवल, १२ वैशाख – रक्षामन्त्री ईश्वर पोखरेलले बुद्ध जन्मस्थल लुम्बिनी सिंगो नेपाली जनताको साझा गौरव गर्ने ठाउँ भएकाले लुम्बिनीमा आयोजना हुने अन्तर्राष्ट्रिय बौद्ध सम्मेलन र बुद्ध जयन्तीलाई भव्यरुपले सफल पार्न तयारीमा लाग्न सबैसँग आग्रह गर्नुभएको छ ।

बुद्ध जन्मस्थल लुम्बिनीमा २५६२ औं बुद्ध जयन्ती तथा अन्तर्राष्ट्रिय बौद्ध सम्मेलनका लागि नेपाली सेनाले करिब एक महिनाको अवधिमा निर्माण गरेको तीन हजारभन्दा बढी क्षमताको सभागृह तथा बुद्ध जन्मस्थल लुम्बिनीमा बुद्ध जयन्ती तथा अन्तर्राष्ट्रिय बौद्ध सम्मेलनको तयारी सम्बन्धमा जानकारी लिन रक्षा मन्त्री पोखरेल आज लुम्बिनी आउनुभएको हो ।

उहाँले भन्नुभयो – “यही वैशाख १५ र १६ गते आयोजना हुने अन्तर्राष्ट्रिय बौद्ध सम्मेलनले नेपालसँगै अन्तर्राष्ट्रिय जगतमा समेत महत्वपूर्ण सन्देश दिने भएकाले यसलाई सफल बनाउनु सबैको कर्तव्य हो ।”

नेपाली जनताको आस्थाको धरोहर लुम्बिनीको संरक्षण तथा प्रचारप्रसार गर्ने काम सबैको चासोको विषय हुनुपर्ने पनि उहाँले बताउनुभयो ।

लुम्बिनीको विकासमा स्थानीय जनता, नागरिक समाज, राजनीतिक दलको विशेष चासो भएमा यसको विकास प्रभावकारी ढंगले अगाडि बढाउन सकिने बताउँदै उहाँले भन्नुभयो, “राष्ट्रिय गौरवको साझा महत्वपूर्ण क्षेत्रको संरक्षण, सम्वर्धन र सुरक्षामा सबै लाग्नुपर्छ ।”

उहाँले लुम्बिनीको योजनाबद्ध विकासका लागि चार दशकदेखि कार्यान्वयनमा रहेको लुम्बिनी गुरुयोजनाको काम विगतमा देशमा जारी द्वन्द्व लगायतका कारणले प्रभावकारीरुपमा अघि बढ्न नसकेको स्वीकार्दै सरकारले लुम्बिनीको विकासका लागि राजनितिक क्रिडास्थल बन्न नदिने, योग्यता, क्षमता र योगदानलाई हेरेर दक्ष र विज्ञ व्यक्तिलाई नेतृत्वको जिम्मेवारी दिने समेत बताउनुभयो ।

रु चार करोड लागतमा उक्त सभागृह नेपाली सेनाले करिब एक महिना लगाएर निर्माण सम्पन्न गरेको हो ।

लुम्बिनीमा हुने तीन दिने कार्यक्रमको सम्पूर्ण तयारीका बारेमा मन्त्री पोखरेललाई प्रदेश ५ का पर्यटन मन्त्री लीला गिरी र लुम्बिनी विकास कोषका निमित्त सदस्य सचिव इन्जिनियर सरोज भट्टराईले जानकारी गराउनुभएको थियो ।

सो अवसरमा मन्त्री पोखरेलले जिल्लास्थित उच्च सुरक्षा निकायका प्रमुख तथा प्रमुख जिल्ला अधिकारीसँग सम्मेलनका लागि भएका सुरक्षा प्रवन्धबारे जानकारी लिनुभएको थियो । मन्त्री पोखरेलले सभागृहको अवलोकनपछि मायादेवी मन्त्रीको अवलोकन तथा दर्शनसमेत गर्नुभएको थियो ।

यही वैशाख १५ र १६ गते अन्तर्राष्ट्रिय बौद्ध सम्मेलन तथा १७ गते २५६२ औँ बुद्धजयन्ती कार्यक्रमका लागि प्रधानमन्त्री केपी शर्मा ओली तीन दिन लुम्बिनीमा रहने कार्यक्रम छ । यस्तै, बुद्ध जयन्ती कार्यक्रमका लागि प्रमुख अतिथि राष्ट्रपति विद्यादेवी भण्डारी लुम्बिनी आउनुहुने कार्यक्रम रहेको छ ।

प्रतिक्रिया

सम्बन्धित सामाग्री

फेसबुक