शुक्रबार, मंसिर १९ २०७७ | Fri, December 04, 2020
नेपालको समय: २२:३८ | UK Time: 16:53

ओली र दाहालले एउटै मञ्चबाट भने, ‘सम्मानजनक, समानतामा आधारित एकता हुन्छ’

वीनेपाली
२०७५ वैशाख ९ गते १८:२४

काठमाडौँमा पार्टी एकता संयोजन समितिले आयोजना गरेको कार्यक्रममा सहभागी प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ । तस्वीर : नवीन पौडेल/रासस

काठमाडौँ – नेकपा एमाले र नेकपा माओवादी केन्द्रबीचको पार्टी एकतालाई सम्मानजनक, समानतामा आधारित र न्यायोचित प्रारुपमा अगाडि बढाउने सहमति भएको खुलासा भएको छ । विश्व सर्वहारा वर्गका नेता भ्लादिमिर लेनिनको १४८ औं जन्मजयन्ती तथा नेपाल कम्युनिष्ट पार्टीको ६९ औं स्थापना दिवस (२२ अप्रिल) का अवसरमा पार्टी एकता संयोजन समितिले आइतबार काठमाडौंमा आयोजना गरेको कार्यक्रमलाई सम्बोधन गर्दै दुवै पार्टीका अध्यक्षले सो सहमति भएको बताएका हुन् ।

पार्टी एकतालाई कसैले पनि रोक्न नसक्ने भन्दै दुई अध्यक्षले आम जनता, पार्टी कार्यकर्ता र नेताहरुको भावनालाई सम्बोधन गर्दै निकट भविष्यमा पार्टी एकता घोषणा गर्ने दाबी गरे । प्रधानमन्त्री एवं एमाले अध्यक्ष केपी शर्मा ओलीले भने, “असम्मानजनक, विभेद र अन्यायको अवस्थामा एकता हुँदैन, सम्मानजनक आधारमा मात्र एकता हुन्छ ।”

पार्टी एकताका विषयमा सन्देह नगर्न आग्रह गर्दै उनले भने, “एकता हुन रोक्नुपर्ने कुरा छैन, एकता रोक्नुपर्ने कारण र तर्क केही पनि छैन, एकता निकट भविष्यमा हुन्छ ।” विगतमा भएका गल्ती नदोहोरयाउने प्रतिबद्धता व्यक्त गर्दै अध्यक्ष ओलीले भने, “एकताबाट पछाडि फर्कने होइन, अब गल्ती गर्दैनौँ, नयाँ ढंगले अगाडि बढ्नेछौँ ।”

शान्तिपूर्ण ढंगले प्रतिस्पर्धात्मक बहुदलीय राजनीतिबाट संघीय लोकतान्त्रिक प्रणालीमा अगाडि बढ्ने विषयमा आफूहरु स्पष्ट रहेको उनले बताए । सामाजिक न्याय, समानतामा आधारित समाज निर्माणमा दुवै पार्टी एकता प्रक्रियामा अगाडि बढेको उल्लेख गर्दै अध्यक्ष ओलीले आफूहरु नीतिगतरुपमा नै सहमत भएको स्पष्ट पारे । राजनीतिक अधिकार प्राप्त भइसकेको उल्लेख गर्दै उनले समृद्धिको मुद्दामा एकताबद्ध भएर अगाडि बढ्ने धारणा राखे ।

सोही अवसरमा माओवादी केन्द्रका अध्यक्ष दाहालले सम्मानजनक, समानतामा आधारित र न्यायोचित परिस्थितिमा पार्टी एकता गर्ने अध्यक्ष ओली र आफूबीच सहमति भएको खुलासा गरे । एकताको ढाँचा तयार गरेर अगाडि बढेको जानकारी दिँदै उनले भने, “पार्टी एकता महत्वपूर्ण विषय हो, त्यसैले सबैको ध्यान त्यसतर्फ छ, यस विषयमा एकअर्काले सम्मान गर्नैपर्छ ।”

एकअर्का पार्टीका नेताले संवेदनशीलतालाई बुझ्नुपर्ने बताउँदै अध्यक्ष दाहालले थपे, “एकअर्का पार्टीका नेताले एक अर्काको संवदेनशीलतालाई बुझिदिनुपर्छ, त्यसो भए सबै विषय ठिकसँग अगाडि बढ्छ ।”

सामूहिक बलबाट नयाँ संकल्पका साथ एकतालाई निष्कर्षमा पुरयाएर राष्ट्रिय एकताको भावमा अगाडि बढिने बताउँदै उनले जनता, कार्यकर्ता र विश्वजनमतको घेरामा रहेको एकता प्रक्रियालाई निष्कर्षमा पुरयाइने बताए ।

अध्यक्ष दाहालले कम्युनिष्ट भित्रको फुटबाट विरोधीले लाभ लिने गरेको भन्दै अबका दिनमा त्यस्तो हुन नदिने प्रतिबद्धता जनाए । देशमा विकास र समृद्धि आवश्यक भए पनि विगतमा राजनीतिक अस्थिरताका कारण त्यसतर्फ मुलुक अगाडि बढ्न नसकेको भन्दै अध्यक्ष दाहालले प्रकृतिले दिएको बरदानलाई सदुपयोग गरेर अगाडि बढ्ने विश्वास दिलाए ।

राजनीतिक परिवर्तन र सामाजिक रुपान्तरण प्रक्रियालाई निरन्तरता दिन आगामी दिनमा बलियो कम्युनिष्ट पार्टी बनाएर अगाडि बढाइने अध्यक्ष दाहालको भनाइ थियो ।

प्रतिक्रिया

सम्बन्धित सामाग्री

फेसबुक