शनिबार, असोज १० २०७७ | Sat, September 26, 2020
नेपालको समय: २०:१८ | UK Time: 15:33

हिन्दु धर्मगुरू बालसन्तमाथि गोली प्रहार गरेको आशंकामा दुई पक्राउ

वीनेपाली
२०७४ चैत २५ गते १६:२८

विराटनगर-प्रहरीले हिन्दु धर्मगुरू बालसन्त श्रीनिवास आचार्यलाई गोली प्रहार गरेको आशंकामा आइतबार दुई जनालाई पक्राउ गरेको छ ।

विराटनगर महानगरपालिका–१४ बाट पक्राउमा परेका ती दुई जनासँग सोधपुछ भइरहेकाले नाम गोप्य राखिएको प्रहरी उपरीक्षक अरुणकुमार विसीले जानकारी गराए । आचार्यमाथि गोली प्रहार भएलगत्तै मोरङमा प्रहरीले खोज अभियानलाई तीव्रता दिएको थियो ।

विराटनगर–१४ स्थित जतुवामा गएराति १.४५ बजे शौचका लागि कोठाबाट बाहिर निस्कनासाथ आचार्यमाथि गोली प्रहार भएको थियो । दाहिने कुममा गोली लागेको उनको विराटनगरको न्यूरो अस्पतालमा उपचार भइरहेको छ । उनी खतरामुक्त रहेको बताइएको छ । घटनास्थलमा मङ्गोल अर्गनाइजेशनको पर्चा भेटिएको प्रहरीले जनाएको छ ।

सुनसरीको चकरघट्टीस्थित लक्ष्मी बैंकटेश मन्दिरका ५० वर्षीय आचार्य आजदेखि विराटनगर–१४ स्थित रामजानकी मन्दिरमा श्रीमद्भागवत पुराण वाचनका लागि आएका हुन् ।

आचार्यको स्वास्थ्य अवस्था बुझ्न १ नं प्रदेशका आन्तरिक मामिला मन्त्री हिक्मत कार्कीसहित सुरक्षा निकायका प्रमुख न्यूरो अस्पताल पुगेका थिए ।

प्रतिक्रिया

सम्बन्धित सामाग्री

फेसबुक