शनिबार, असोज ३ २०७७ | Sat, September 19, 2020
नेपालको समय: १७:५९ | UK Time: 13:14

पुनःनिर्माण प्राधिकरणको कामसँग प्रधानमन्त्री असन्तुष्ट

रासस
२०७४ चैत १९ गते १:०३

प्रधानमन्त्री निवास बालुवाटारमा प्रधानमन्त्री केपी शर्मा ओलीको अध्यक्षतामा आइतबार साँझ बसेको राष्ट्रिय पुनःनिर्माण प्राधिकरण परामर्श समितिको बैठक । तस्बिर सौजन्य – प्रधानमन्त्रीको सचिवालय, रासस

काठमाडौँ, १८ चैत – राष्ट्रिय पुनःनिर्माण प्राधिकरण परामर्श परिषद्को बैठकले पुनःनिर्माणको काम हरसम्भव उपाय अवलम्बन गरेर पूरा गर्न प्राधिकरणलाई निर्देशन दिएको छ ।

प्रधानमन्त्री केपी शर्मा ओलीको अध्यक्षतामा प्रधानमन्त्री निवास बालुवाटारमा आज साँझ बसेको परामर्श परिषद्को बैठकमा भूकम्पपछिको पुनःनिर्माणमा हालसम्म भएको प्रगतिको समीक्षा भएको प्रवक्ता यामलाल भुसालले जानकारी दिनुभयो ।

परामर्श परिषद्को आजको बैठकपछि पुनःनिर्माणको बाँकी कार्यलाई थप प्रभावकारी र चुस्त ढंगबाट अघि बढाउन विस्तृतरुपमा छलफल गर्न आगामी मंगलबार निर्देशक समितिको बैठक बोलाउने निर्णय भएको प्रवक्ता भुसालले बताउनुभयो ।

बैठकमा प्रधानमन्त्री ओलीले प्राधिकरणको कामको प्रगतिसँग आफू सन्तुष्ट नरहेको बताउनुभएको छ । प्रधानमन्त्री ओलीले पुनःनिर्माणको कामलाई कुनै पनि बहानामा नअल्झाउन तथा हरसम्भव प्रयास गरेर पूरा गर्न निर्देशन दिनुभएको थियो ।

“निर्माणको काम धिमा गतिमा भयो”, प्रधानमन्त्री ओलीले भन्नुभयो, “यसलाई गति दिनुपर्छ । कतिपय पीडितले मापदण्ड नपुरयाइ घर निर्माण गरेको भनेर सरकारले दिने अनुदान रोक्नु जायज होइन ।”

“भूकम्प गएको तीन वर्षपछि मापदण्डको फित्ता र डण्डी लिएर गएर हुँदैन । निर्माण गरिसकेका घरलाई अनुदान उपलब्ध गराउनुपर्दछ,” उहाँले भन्नुभयो ।

पहिलेदेखि बसोबास गरिआएका तर जग्गाधनी पूर्जा नभएका घरधनीलाई पनि अनुदान रकम उपलब्ध गराउन निर्देशन दिँदै उहाँले ऐन कानूनले केही अफ्ठ्यारो पार्छ भने सच्याएर अरुले पाएसरह सुविधा दिने व्यवस्था गर्नुपर्दछ ।

प्रधानमन्त्री ओलीले सिंहदरबार भवन पुनःनिर्माण विश्वविद्यालयमा पढेर आएर अभ्यास गर्ने ठाउँ नभएको उल्लेख गर्दै सिंहदरबारको मूल भवनमा भइरहेको रेट्रो फिटिङको ढिलाईप्रति असन्तुष्टि जनाउनुभयो ।

अघिल्लो पटक आफू प्रधानमन्त्री हुँदा शुरु गरेको ‘म बनाउँछु मेरो धरहरा’ कार्यक्रम अलपत्र परेकोमा अब तिव्रता दिइनेछ भन्नुभयो ।

परिषद्मा १४ जना सांसद मनोनीत

प्रधानमन्त्री ओलीले भूकम्प अतिप्रभावित क्षेत्रका १४ जना सांसदलाई परिषद्मा मनोनीत गर्नुभएको छ ।

मनोनीत हुनेमा यज्ञराज सुनुवार, पार्वत गुरुङ, श्यामकुमार श्रेष्ठ, अग्नि सापकोटा, गंगाबहादुर तामाङ, हरिबोल गजुरेल, प्रेम सुवाल, गगनकुमार थापा, मोहन आचार्य, भूमि त्रिपाठी, हितबहादुर तामाङ, पम्फा भुसाल, विरोध खतिवडा र हरिराज अधिकारी हुनुहुन्छ ।

प्रतिक्रिया

सम्बन्धित सामाग्री

फेसबुक