काठमाडौँ, १६ चैत – प्रतिनिधिसभा सदस्यले फागुन ७ गते प्रजातन्त्र दिवस र माघ १६ गते शहीद दिवसको बिदा कटौतीको विरोध गर्दै तत्काल सो निर्णय फिर्ता लिन सरकारसंग माग गर्नुभएको छ ।
प्रतिनिधिसभाको आजको बैठकमा नेपाली काँग्रेसका दिलेन्द्रप्रसाद बडूले प्रजातन्त्र स्थापना भएको दिन र जनताका अधिकारका लागि सहादत प्राप्त गरेको शहीदको स्मरण गर्ने दिनको बिदा सरकारले कटौती गरेकामा आपत्ति जनाउँदै तत्काल फिर्ता गर्न माग गर्नुभयो ।
सांसद बडूले दार्चुलाको सिमानामा भारतीय पक्षबाट एकपक्षीय रुपमा बनाइएका पुलको विषयलाई लिएर तनावग्रस्त अवस्था भएको भन्दै समाधानका लागि तत्काल पहल गर्न सरकारको ध्यानाकर्षण पनि गराउनुभयो ।
सांसद हृदयेस त्रिपाठीले किसानले आफ्नो उत्पादनको मूल्य आफैं तय गर्न नपाएको अवगत गराउँदै उखु किसानले हालसम्म रु ११ अर्ब पाउन बाँकी रहेकाले यसमा सरकारले तत्काल आवश्यक कदम चाल्नुपर्नेमा जोड दिनुभयो ।
नेकपा (माओवादी केन्द) का प्रभु साहले तराईमा बाढीपीडित जनताका समस्या यथावत् रहको भन्दै तत्काल पुनःस्थापना र दीर्घकालीन राहतको माग गर्नुभयो ।
उहाँले आगामी वर्षामा आउन सक्ने बाढीको सम्बन्धमा सचेत हुनुपर्नेमा जोड दिदैं प्रधानमन्त्री केपी शर्मा ओलीको आसन्न भारत भ्रमणको एजेण्डाका सम्बन्धमा संसद्लाई जानकारी गराउनुपर्छ भन्नुभयो ।
राष्ट्रिय जनता पार्टी नेपालका अनिलकुमार झाले रौतहटमा असिनाबाट भएको क्षतिका बारेमा जानकारी गराउँदै तत्काल राहत व्यवस्थाको माग गर्नुभयो । उहाँले जनताका भावनासंग गाँसिएका सार्वजनिक बिदा कटौतीको विरोध गर्दै बिदामा कटौती गरेर मात्र काममा प्रगति नहुने धारणा व्यक्त गर्नुभयो ।
संघीय समाजवादी फोरम नेपालका विमलप्रसाद श्रीवास्तावले सरकारबाट दलितको घर बनाउने भनेर बजेट निकासा भए पनि पूरा नभएको भन्दै सरकारको ध्यानाकर्षण गराउनुभयो । उहाँले तराईमा आएको असिना पानीबाट कृषिमा भएको क्षतिका सम्बन्धमा ध्यानाकर्षण पनि गराउनुभयो ।
राष्ट्रिय जनमोर्चाका दुर्गा पौडेलले नेपाली नागरिकलाई जहाँ बसे पनि मतदान गर्न पाउने व्यवस्था गर्नुपर्ने माग गर्दै विदेशमा बस्ने करीब ४० लाख नेपालीलाई विदेशबाट मतदानको व्यवस्था गर्नुपर्ने उल्लेख गर्नुभयो ।
एमालेका राजेन्द्रप्रसाद गौतमले संखुवासभामा भएको जिप दुर्घटनाको जानकारी गराउँदै दुर्घटनामा निधन भएकाको सम्मानसहित उचित क्षतिपूर्तिको व्यवस्था गर्न सरकारसँग माग गर्नुभयो ।
काँग्रेसका जीवछिरिङ लामाले भूकम्पपीडितका घर द्रुत गतिमा निर्माण गर्न सरकारले ध्यान दिनुपर्ने बताउनुभयो ।
माओवादी केन्द्रका गजेन्द्र महतले जुम्लामा अस्पताल भए पनि डाक्टर नभएको र सडक भए पनि यातायातको व्यवस्था नभएको भन्दै आवश्यक व्यवस्था गर्न सरकारको ध्यानाकर्षण गराउनुभयो ।
माओवादी केन्द्रका गंगा सत्गौवा चौधरीले गौतमबुद्ध जन्मेको देशमा गाई काटेर खान पाउनुपर्छ भन्ने विषय सार्वजनिक भएको विषयप्रति टिप्पणी गर्दै कुनै पनि धर्मका नाममा पशुको काटमार गर्नु अमानवीय हो भन्नुभयो ।
काँग्रेसका राजेन्द्र केसीले दक्षिणकाली बस दुर्घटनामा परेका घाइतेको निःशुल्क उपचारका लागि सरकारसँग माग गर्नुभयो ।
नेपाल मजदूर किसान पार्टीका प्रेम सुवालले ठूला कुराभन्दा साना साना कुरामा सरकारको ध्यान जानुपर्ने भन्दै काठमाडौँ उपत्यकामा राष्ट्रपतिको सवारीले सडक जाम भएको गुनासो गर्नुभयो ।
पाठक राष्ट्रिय समाचार समिति (रासस) का प्रधानसम्पादक हुन्।
