बिहीबार, असोज ७ २०७८ | Thu, September 23, 2021
नेपालको समय: २०:०७ | UK Time: 15:22

२ नं. प्रदेश सभामुखको निर्वाचन फागुन २ गते

वीनेपाली
२०७४ माघ २० गते १५:५३

प्रदेश नम्बर २ को माघ २१ गते आईतबार बस्ने प्रदेश सभा बैठकको लागि तयार गरिएको जनकपुर उपमहानगरपालिकाको कुवारामपुरस्थित शिक्षा कार्यालय धनुषा तथा शिक्षक तालिम केन्द्रको भवन । तस्वीर – अजयकुमार साह, धनुषा, रासस

जनकपुरधाम- प्रदेश नं २ को प्रदेशसभा सभामुखको निर्वाचन फागुन २ गते हुने भएको छ । आइतबारदेखि यहाँ हुने प्रदेशसभा प्रथम अधिवेशनका लागि आज बसेको सर्वदलीय बैठकले मस्यौदाको कार्यसूची सर्वसम्मतिबाट अनुमोदन गरी सो मिति निर्धारण गरेको जनाइएको छ ।

संघीय संसद् सचिवालयका उपसचिव वंशीराज पौडेलले मस्यौदामा सामान्य संशोधन गरिएको बताउँदै सभामुखको निर्वाचनको तालिका २९ गते निर्धारण गरिने जानकारी दिए ।

कार्यव्यवस्था परामर्श समितिको माघ २९ गते बिहान ८ बजे बस्ने बैठकले सभामुखको निर्वाचन तालिका निर्धारण गरी सोही दिन १ बजे बस्ने प्रदेशसभाको बैठकमा सो तालिका प्रस्तुत गरिने बताइएको छ ।

बैठकले नियमावली मस्यौदा समिति गठन सम्बन्धमा विस्तृत छलफल गरी अर्को बैठकमा अन्तिम रुप दिने निर्णय गरेको छ ।

त्यस्तै बैठकले प्रदेशसभा सदस्य, सभामुख, कर्मचारी, मर्यादापालकका पोशाक, सिट निर्धारण, अध्यक्ष मण्डलको मनोनयन, सभाको अन्तरिम कार्यविधिको मस्यौदा कार्यसूचीलाई अनुमोदन गरेको छ ।

प्रदेशसभाको पहिलो बैठक भोलि आइतबार दिनको ११ बजे शैक्षिक तालीम केन्द्र जनकपुरधाममा स्थापना गरिएको प्रदेशसभा भवनमा बस्ने भएको छ ।

प्रतिक्रिया

सम्बन्धित सामाग्री

फेसबुक