सरकारले देशलाई कंगाल बनाउन खोजेको ओलीको आरोप

पत्रकार सम्नेलनमा केपी शर्मा ओली । तस्वीर- रासस

काठमाडौं- नेकपा एमालेका अध्यक्ष केपी शर्मा ओलीले सरकारले देशलाई आर्थिक रुपमा कंगाल बनाउन खोजेको आरोप लगाएका छन् ।

बिहीबार पार्टी कार्यलय धुम्बाराहीमा आयोजित पत्रकार सम्मेलनमा बोल्दै ओलीले प्रधानमन्त्री शेरबहादुर देउवाले जाने बेला विभिन्न निर्णयहरु गरेर देशलाई आर्थिक संकटमा पार्न खोजेको बताए ।

वर्तमान सरकारका आर्थिक क्रियाकलाप र ६५ वर्ष पुगेकालाई वृद्धभक्ता दिनेजस्ता निर्णयप्रति ओलीले कटाक्ष गरे । ‘यो सरकार निर्लज्ज भयो, कुनै उत्तरदायित्व होइन्, देशलाई बोझ बोकाउने काम भयो,’ उनले भने, ‘अरुले जिते भने देशलाई कंगाल नै बनाइदिने ?’ उनले ६५ वर्ष पुगेकालाई वृद्धभत्ता दिने निर्णय लोककल्याणकारी र जनताप्रतिको उत्तरदायित्वबाट नभई देशलाई आर्थिक भार बोकाउने उद्देश्यले ल्याइएको बताए ।

ओलीले संविधान, कानुन र राष्ट्रहित विपरितका निर्णय नयाँ सरकारले अस्वीकार गर्ने बताए । उनले नयाँ कर्मचारी भर्ना गर्नुपर्ने बेला ६० अर्ब खर्च गरेर भएका कर्मचारीलाई समेत अवकास दिने खोजिएको भन्दै आलोचना गरे ।

उनले सिमाना मिचिएको विषयमा सरकारले केही नबोलेको भन्दै सिमाना मिचिएको विषय आफूलाई मान्य नहुने बताए ।

ओलीले माओवादी केन्द्रसँगको पार्टी एकीकरण धेरै अगाडि बढिसकेको उल्लेख गर्दै अब पछाडि फर्किने बाटो नरहेको बताए । सो क्रममा ओलीले नवराज सिलवाल र कोमल वलीको समेत बचाउ गरेका थिए ।

प्रतिक्रिया

सम्बन्धित सामाग्री