आइतबार, कार्तिक ९ २०७७ | Sun, October 25, 2020
नेपालको समय: ०७:४४ | UK Time: 01:59

हेल्प नेपाल यूकेद्वारा मुर्मा हेल्थ पोष्टलाई १७ लाख सहयोग

वीनेपाली
२०७४ माघ ११ गते ११:५४

लन्डन । हेल्प नेपाल नेटवर्क युकेले मुगु जिल्लाको मुर्मामा स्थापित ‘हेल्प नेपाल हेल्थ पोष्ट’ सन्चालनकालागि झण्डै १७ लाख रुपियाँ सहयोग गरेको छ ।

सन् २००४ मा विकट मुगु जिल्लामा स्वास्थ्यसेवा पुरयाउने उद्देश्यले स्थापना गरिएको सो स्वास्थ्यचौकीमा अहिले एकजना हेल्थ असिस्टेन्ट, एक अहेव, एक अनमी तथा एक सहायक कार्यरत छन् । उनीहरुको तलब, भत्ता, स्वास्थ्यचौकीका लागि आवश्यक औषधि समेतकालागि झण्डै रु १७ लाख बराबरको सहयोग पठाइएको हेल्पनेपाल नेटवर्क युकेका कोषाध्यक्ष सचिन श्रेष्ठले बताए । उक्त स्वास्थ्य चौकीको सन्चालनकालागि स्कटल्याण्डस्थित एभरेष्ट म्याराथन फण्ड लगायतका संघसंस्थाहरुले सघाउँदै आएका छन् ।

हेल्प नेपाल नेटवर्कका अनुसार गत जुलाई २०१६ देखि जुलाई २०१७ को अवधिमा सो स्वास्थ्यचौकीले मुर्मा र वरिपरिका रारा, पिना, सेरी, गाम्ठा लगायत सातवटा विकट गाविसहरुका ४,१७६ जनालाई स्वास्थ्य उपचारसेवा प्रदान गरेको थियो ।

सो अवधिमा स्वास्थ्यचौकीबाट ग्यास्ट्रीक, झाडापखाला, रुघाखोकी, जरोबाट पीडित बिरामीहरुको उपचार गरिएको थियो । त्यस्तै उक्त स्वास्थ्यचौकीले विभिन्न खोप लगाउनुकासाथै गर्भवती महिलाको स्वास्थ्य परीक्षण तथा सुत्केरी सेवा पनि उपलब्ध गराएको थियो ।

यसैगरी सो स्वास्थ्यचौकीले तीनवटा स्थानीय विद्यालयहरुमा स्वास्थ्य शिक्षा कार्यक्रम पनि सन्चालन गरेको थियो ।

हेल्प नेपाल नेटवर्कले नेपालमा भूकम्पबाट क्षतिग्रस्त विद्यालयहरुको पुनर्निर्माणमा सघाउनुकासाथै तराईमा बाढीबाट पीडित जनसमुदायलाई आपत्कालिन सहायता पनि पुरयाउंदै आएको छ ।

प्रतिक्रिया

सम्बन्धित सामाग्री

फेसबुक