‘वामपन्थीले अधिनायकवादको संकेत देखाए’

काठमाडौं । नेपाली कांग्रेसका नेता डा. शेखर कोइरालाले वामपन्थीमा अधिनायकवादको संकेत देखिएको टिप्पणी गरेका छन् । गृहजिल्ला विराटनगर पुगेका कोइरालाले बुधवार आफ्नै निवासमा सञ्चारकर्मीसंग कुरा गर्दै वाम गठबन्धनले राष्ट्रियसभा निर्वाचन सम्बन्धि अध्यादेश रोक्न राष्ट्रपति विद्यादेवी भण्डारीलाई दवाव दिएर अधिनायकवादी चरित्र देखाएको बताए ।

‘एमाले माओवादीले जसरी अध्यादेश रोक्न दवाव दिए, त्यो अधिनायकवादको संकेत हो’- उनको भनाई थियो । यद्यपि राष्ट्रपति भण्डारीबाट राष्ट्रियसभा सम्बन्धि अध्यादेश साता अघि स्वीकृत भइसकेको छ ।

नेता कोइरालाले पार्टी सभापतिका लागि आफू पनि योग्य भएको बताए । पार्टीमा सुरु भएको युवालाई नेतृत्व हस्तान्तरण वहस सकारात्मक भएको उनको भनाई थियो । कोइरालाले सरकार निर्माणको सन्दर्भमा देउवाले सरकार छोड्नुपर्ने भनाई राखे । ‘नैतिक रुपमा भन्ने हो भने निर्वाचनमा पराजित भइसकेपछि देउवाजीले सरकारमा बसिरहन सुहाउंदैन’- कोइरालाको धारणा थियो ।