लन्डन । बेलायती रातो पासपोर्टको सपना सांच्नेहरु विश्वमै असंख्य छन् । अझ विकासोन्मुख देशका नागरिकलाई यो लिन कम्ती रहर छैन् । नेपालीमा समेत रातो पासपोर्ट आकर्षण अधिक छ । यसकै लागि कतिले लाखौं खर्च गरेका छन्, कतिले नक्कली बिहे गरेका छन् । कति शरणार्थी भए । तर, ब्रेक्जिटपछि रातो पासपोर्टको रंग फेरिने भएको छ । अब निलो रंगले रातोलाई विस्थापित गर्नेछ र नयां पासपोर्टमा सन् १९८० को दशकदेखि रहेको युरोपियन युनियन चिन्ह हटाइने छ ।
सन् १९२१ मा पहिलोपटक बेलायती पासपोर्टमा निलो ‘कभर’ प्रयोग गरिएको थियो तर बेलायत युरोपियन युनियनमा आवद्ध भएपछि सन् १९८८ देखि रातो बनाइएको थियो । बेलायत मार्च २९, २०१९ मा युरोपियन युनियनबाट बहिगर्मन हुने प्रक्रियामा छ ।
यसै वर्षको शुरुमा राहदानी नयां विस्थापित गर्न ४९० मिलियन पाउण्डको सम्झौता भइसकेको छ । होम अफिस मन्त्री ब्रान्डन लिउसले नयां पासपोर्ट अहिलेसम्मकै उच्च प्रविधियुक्त र दुरुपयोग वा नक्कली बनाउन नमिल्ने खालको हुने बताए ।
