बुधबार, कार्तिक १२ २०७७ | Wed, October 28, 2020
नेपालको समय: ११:५९ | UK Time: 06:14

ढुक्क भएर निर्वाचन तयारीमा लाग्न राष्ट्रपतिबाट प्रमुख आयुक्तलाई सुझाव

वीनेपाली
२०७४ कार्तिक १५ गते २०:२१

राष्ट्रपति भवन शीतलनिवास । तस्बिर – रोशन सापकोटा, रासस

काठमाडौँ, १५ कात्तिक (रासस) – राष्ट्रपति विद्यादेवी भण्डारीसमक्ष निर्वाचन आयोगका प्रमुख निर्वाचन आयुक्त डा आयोधीप्रसाद यादवले आज अपराह्न राष्ट्रपति भवन शीतल निवासमा भेट गर्नुभयो ।

सो अवसरमा राष्ट्रपतिबाट निर्वाचन तोकिएकै मितिमा हुने कुरामा कतै द्विविधा नराखी काम गर्न प्रमुख आयुक्तलाई सुझाव दिनुभएको थियो । आयोगले गरेको निर्वाचनको तयारीप्रति सन्तोष प्रकट गर्दै राष्ट्रपतिले भन्नुभयो, ‘सशंकित हुनुपर्दैन, हामी आयोगको साथमा छौँ र ढुक्क भएर अगाडि बढ्नुहोस् ।’

भेटका अवसरमा प्रमुख निर्वाचन आयुक्त डा यादवले मंसिर १० र २१ गते हुने प्रतिनिधिसभा र प्रदेशसभा सदस्य निर्वाचनको तयारी अवस्थाबारे राष्ट्रपतिलाई अवगत गराउनुभएको आयोगका प्रवक्ता नवराज ढकालले जानकारी दिनुभयो ।

सर्वोच्च अदालतको आदेशअनुसार पहिलो हुने निर्वाचित हुने निर्वाचन प्रणालीतर्फ प्रतिनिधिसभा र प्रदेशसभाका लागि छुट्टाछुट्टै मतपत्र छपाइ गर्ने कार्य जारी रहेको तथा मतदान केन्द्रित निर्वाचनका लागि आवश्यक पर्ने सामाग्रीको व्यवस्थापन गर्ने कार्य तीव्ररुपमा भइरहेको राष्ट्रपतिसमक्ष उहाँले जानकारी गराउनुभएको थियो ।

प्रतिक्रिया

सम्बन्धित सामाग्री

फेसबुक