तस्विर- रोयटर्स
क्यानबेर्रा, १० कात्तिक (रासस-सिन्ह्वा) – अष्ट्रेलियाका उपप्रधानमन्त्री बार्नाबी जोयस संसदमा रहिरहन अयोग्य ठहरिनु भएको छ ।
उहाँसँगै अन्य चार जना राजनीतिज्ञलाई पनि शुक्रबार उच्च अदालतले सांसद रहिरहन अयोग्य ठहर गरेको हो । अयोग्य ठहरिनु भएका जोयस लिवरल नेश्नल पार्टीसँग सत्ता साझेदारी गरेको नेश्नल पार्टीका नेता हुनुहुन्छ ।
उहाँहरुसँग दोहोरो नागरिकता रहेकाले उहाँहरु सांसद बन्न अयोग्य भएको फैसला अदालतले गरेको हो ।
अष्ट्रेलियाको संविधानमा दोहोरो नागरिकता भएको व्यक्ति निर्वाचित हुन नपाउने व्यवस्था छ । जोयसकै पार्टीका उपनेता तथा सांसद फिओना नाश, माल्कोलम रोबर्टस्, स्कट लुड्लाम र लारिसा वाटर्स पनि अयोग्य ठहरिनु भएको हो । उहाँहरुले भने यसअघि नै सांसद पदबाट राजीनामा दिईसक्नु भएको थियो ।
जोयस र लुड्लामका बुवा आमा न्युजल्याण्डमा जन्मिएका हुन् । त्यसैगरी नाशको बुवा स्कटल्याण्डमा जन्मिनु भएको हो भने रोबर्टस् भारतमा जन्मिनु भएको थियो । त्यस्तै वेल्स र उहाँको बुवाको जन्म क्यानडामा भएको हो ।
उहाँहरुको सांसद पद खारेज भएसँगै अष्ट्रेलियाको अहिलेको सरकारले संसदको बहुमत गुमाएको छ ।
