राष्ट्रपति भवन शीतलनिवास । तस्बिर – रोशन सापकोटा, रासस

काठमाडौँ, २८ असोज (रासस) – राष्ट्रपति विद्यादेवी भण्डारीसँग आज राष्ट्रपति भवन शीतलनिवासमा निर्वाचन आयोगका पदाधिकारीले भेट गर्नुभएको छ ।

भेटका अवसरमा राष्ट्रपति भण्डारीले राजनीतिक वातावरण आफ्नो हिसाबले चलायमान हुने हुँदा त्यसप्रति नअलमलिई निर्वाचन सम्पन्न गर्ने कार्यमा लाग्न निर्वाचन आयोगका पदाधिकारीलाई सुझाव दिनुभएको आयोगका प्रवक्ता नवराज ढकालले जानकारी दिनुभयो ।

आगामी मंसिरमा हुने प्रतिनिधिसभा र प्रदेशसभा सदस्य निर्वाचनलाई स्वच्छ, निष्पक्ष र शान्तिपूर्ण वातावरणमा सञ्चालन गर्न आयोगले गरेको तयारीबारे जानकारी हासिल गर्दै राष्ट्रपति भण्डारीले प्रतिनिधिसभा र प्रदेशसभा सदस्यको निर्वाचन तोकिएकै मितिमा सम्पन्न गर्न शुभकामना दिनुभएको थियो ।

सो अवसरमा प्रमुख निर्वाचन आयुक्त डा अयोधीप्रसाद यादवले निर्वाचनको मिति प्राप्त भएपछि निर्वाचनसम्बन्धी आवश्यक नियमावली, निर्देशिका एवं कार्यविधिहरू तयार गरिएको, निर्वाचन सामग्रीको व्यवस्थापन कार्य तदारुकताका साथ भइरहेको जानकारी गराउनुभएको थियो ।

भेटमा आयुक्तहरू इला शर्मा, नरेन्द्र दाहाल, इश्वरी पौड्याल र सुधीरकुमार शाह तथा सचिव बेगेन्द्रराज शर्मा पौड्याल सहभागी हुनुहुन्थ्यो ।