लन्डन । बढ्दो प्रतिष्पर्धासंगै सस्ता बजेट एयरलाइन्सका कारण बेलायतमा हवाई यात्रुको संख्या अकासिएको छ । सुरक्षित यात्रा, समय वचत र सस्तो भएका कारण बेलायतमा हवाई यात्रुको संख्या बढ्ने क्रम जारी छ । व्यस्त होलिडेको समयमा बेलायतका एयर ट्राफिक कन्ट्रोलरहरुले २४ घन्टामा ८ हजार आठ सय उडान व्यवस्थापन गर्ने गरेको पाइएको छ । गत जुन देखि अगस्ट महिनामा बेलायती आकासमा करिब ७ लाख ७० हजारवटा जहाज उड्ने अनुमान गरिएको छ जुन गत वर्ष भन्दा ४० हजार बढि हुनेछ । सन् २०१६ मा २४ लाख ५० हजार उडान बेलायती आकासमा उडेको तथ्यांक छ । बेलायतको एयर ट्राफिक कन्ट्रोलरले व्यस्त समयको समिक्षा गरि उडान योजना एक वर्ष भन्दा अगाडि देखि हुने बताएका छन् ।
बेलायती अर्थतन्त्रमा हवाईमार्गले करिब ६० अर्ब पाउन्डको योगदान गरेको लन्डनका अर्थ ब्यवस्थापन बिज्ञ विकलचन्द्र आचार्य बताउंछन् । यसले ९ अर्ब पाउण्ड भन्दा बढि कर सरकारलाई बुझाउने उल्लेख गर्दै आचार्यले करिब १० लाख मानिसले प्रत्यक्ष रोजगारी पाइरहेको जनाए ।
बेलायतको सबैभन्दा ठूलो एयरपोर्ट हिथ्रोको व्यस्तता हरेक वर्ष बढ्दो छ । यसले सन् २०१६ मा साढे सात करोड भन्दा बढि यात्रुको सेवा गरेको जनाइएको छ । बेलायतका ठूला पांच विमानस्थल व्यवस्थापन गर्ने बिएए सिस्टम अन्तर्गत रहेको हिथ्रो एयरपोर्टको सन् २०१६ को वार्षिक टर्नओभर करिब दुई अर्ब ८० करोड पाउण्ड छ । पश्चिम लण्डनमा अवस्थित हिथ्रोमा ७६ हजार भन्दा बढिले रोजगारी पाएका छन् ।
दुई धावनमार्ग रहेको हिथ्रो एयरपोर्टको बढ्दो व्यस्तताका कारण तेश्रो धावनमार्ग जरुरी रहेको व्यवसायीले बताउंदै आएका छन् । तर, तेश्रो धावनमार्गबारे बेलायतभित्र निकै राजनीतिक वहस हुंदै आएको छ । प्रदुषण लगायत हिथ्रोको सामर्थका लागि अर्को धावनमार्ग जरुरी नभएको एकथरिको तर्क छ भने अर्का थरिले अन्तर्राष्ट्रिय प्रतिष्पर्धा र बढ्दो ब्यवसायको अवसरका लागि हिथ्रोको क्षमता अरु बढाइनु अपरिहार्य भएको बताउंदै आएका छन् ।
बढ्दो यात्रु संख्यालाई मध्यनजर राख्दै बेलायत सरकारले गत अक्टोबरमा तेश्रो धावनमार्ग बनाउन सहमति गरेको छ । १२२७ हेक्टरमा फैलिएको हिथ्रो एयरपोर्ट यात्रुको संख्याले युरोपको सबैभन्दा व्यस्त विमानस्थल हो । ८२ देशका १९४ शहरबाट ८१ एयरलाइन्सले उडान भर्छन् हिथ्रोमा । ९३ प्रतिशत अन्तर्राष्ट्रिय उडान छन् । सन् २०१३ मा ३० लाख भन्दा बढी यात्रुले हिथ्रोबाट न्यूयोर्कको जोन एफ केनेडी एयरपोर्ट उडान गरेका थिए, जुन सबैभन्दा लोकप्रिय उडान हुने शहर हो ।
बेलायतको दोश्रो ठूलो एयरपोर्ट मानिन्छ ग्याटवीक । यसमा वार्षिक करिब चार करोड भन्दा बढी यात्रुले यात्रा गर्छन् । सन् २०१६ मा बजेट एयरलाइन्स इजी जेटका यात्रु मात्र करिब ४० प्रतिशत रहेको तथ्यांकले देखाएको छ । ब्रेक्जिटका कारणबाट बजेट एयरलाइन्स केहि प्रभावित हुन सक्ने विश्लेषण आचार्यको छ । युरोपका प्रमुख शहरमा उडान भर्ने सस्ता एयरलाइन्सहरुले बे्रक्जिटपछि कस्तो नीति अवलम्बन गर्छन् र बेलायत सरकारले इर्यू नागरिकलाई आवतजावतको हकमा कस्तो नीति लिने हो चासोको विषय छ । ब्रेक्जिटले बजेट एयरलाइन्सको शुल्क तथा काम कारबाहीमा असर पर्न सक्ने अनुमान छ ।
उत्तरी इंग्ल्यान्डको अर्थतन्त्रलाई ध्यानमा राख्दै बेलायत सरकारले म्यानचेस्टर एयरपोर्टमा एक अर्ब पाउण्ड लगानी बढाई यस एयरपोर्टको सामर्थ बढाउने जनाएको छ ।
