नेकपा(माओवादी केन्द्र)को पार्टी केन्द्रिय कार्यालय पेरिसडाँडामा भएको केन्द्रिय कार्यालयको विस्तारित बैठकमा पार्टी अध्यक्ष पुष्पकमल दाहाल ‘प्रचण्ड’ लगायत शीर्ष नेता । तस्बिर सौजन्य ः अध्यक्ष दाहालको सचिवालय, रासस
काठमाडौँ, ३ साउन । नेकपा (माओवादी केन्द्र)का नेताहरुले जम्बो केन्द्रीय समिति भंग गरी संगठनलाई चुस्त दुरुस्त बनाउनका लागि माग गरेका छन् ।
विस्तार हुन नसकेको तथा जनतामा नसकिएको भन्दै नेकपा (माओवादी केन्द्र)को केन्द्रीय कार्यालयको बैठकमा तत्काल सुधारको प्रक्रिया थाल्न नेताहरुले पार्टी नेतृत्वलाई आग्रह गरेका छन् ।
पार्टी केन्द्रीय कार्यालय पेरिसडाँडामा जारी केन्द्रीय सचिवालयको विस्तारित बैठकमा उनीहरुले स्थानीय तहको संगठन सुधार नै सबैभन्दा प्रमुख हतियार रहेको धारणा राख्दै चुस्त र दुरुस्त सांगठनिक संरचना तयार पार्न नेतृत्वको ध्यानकर्षण गराएका हुन् ।
स्थानीय तहको निर्वाचनमा अपेक्षित परिणाम निकाल्न नसक्नुको पछाडि आन्तरिक तयारीको अभाव, प्रभावकारी रुपमा नेता तथा कार्यकर्ता परिचालनमा देखिएको समस्या तथा गुटगत मानसिकताले पनि काम गरेको उनीहरुको भनाइ छ ।
बैठकमा उनीहरुले संगठन बिनाको जम्बो केन्द्रीय समितिले काम गर्नै नसक्ने भन्दै चुस्त संगठन निर्माण गर्न, सबै तहका नेता तथा कार्यकर्ता एक तह घटेर काम गर्न तयार हुनुपर्नेमा जोड दिएका थिए ।
निर्वाचनको अनुभवको अभाव, विपक्षी पार्टीले गरेको गलत प्रचारको खण्डन गर्न नसक्नु, आर्थिक स्रोतको अभाव तथा सरकारमा बसेर गरेका प्रभावकारी काम जनताका बीचमा जान नसक्नु जस्ता कारणले पार्टीले अपेक्षित परिणाम हासिल गर्न नसकेको उनीहरुको टिप्पणी थियो ।
सोमबार अध्यक्ष पुष्पकमल दाहाल ‘प्रचण्ड’ले धारणा राखेर सुरु भएको बैठकमा सातवटै प्रदेशका इन्चार्जले आ–आफ्नो क्षेत्रको प्रतिवेदन पेश गर्नुभएको थियो । आज नेताहरु जनार्दन शर्मा, उर्मिला अर्याल, टेकबहादुर बस्नेत, जीवन बुढा, रामदीप आचार्य, पूर्ण सुवेदी, हेमराज भण्डारी, कमला रोका, डिलाराम आचार्य, दधिराम न्यौपानेलगायतले आफ्नो धारणा राख्नुभएको प्रवक्ता पम्फा भुसालले जानकारी दिनुभयो ।
स्थानीय तहको निर्वाचन समीक्षा, भावी चुनावी रणनीति र सांगठनिक बिषयमा छलफल गर्न बोलाइएको उक्त बैठक पुनः बुधबार ११ बजे बस्नेछ ।
